ষোল্লগৰাকী ব্যক্তিক শনিবাৰে ত্ৰিপুৰাত ক’ভিড-১৯ পজিটিভ পোৱা গৈছে।
ইয়াকে লৈ ৰাজ্যখনত মুঠ ক’ভিড-১৯ আক্ৰান্ত ১৮৯গৰাকীলৈ বৃদ্ধি পাইছে।
ক’ভিড-১৯ পজিটিভ চিনাক্ত আটাইকেইগৰাকী ব্যক্তিয়ে মুম্বাইৰ পৰা ৰেলযোগে বৃহস্পতিবাৰে আগৰতলাত উপস্থিত হৈছিল।
ত্ৰিপুৰাৰ অতিৰিক্ত মুখ্য সচিব তথা স্বাস্থ্য সচিব সঞ্জয় কুমাৰ ৰাকেশে জনাই যে ৰোগীকেইজনক নতুনকৈ মুকলি কৰা ক’ভিড সেৱা কেন্দ্ৰ ভগৎ সিং যুৱ আৱাসলৈ স্থানান্তৰিত কৰা হ’ব।
এতিয়ালৈকে ৰাজ্যখনত ১৫৩গৰাকী ক’ভিড-১৯ ৰোগী আৰোগ্য হৈছে আৰু তেওঁলোকক চিকিৎসালয়ৰ পৰা যাবলৈ দিয়া হৈছে।
শনিবাৰে সন্ধিয়া ৰাজ্যৰ শিক্ষা মন্ত্ৰী ৰতন লাল নাথে এই তথ্য সদৰী কৰিছে।
ইফালে ৰাজ্যখনত বি এছ এফ জোৱানসকলৰ মাজত ব্যাপকভাৱে ক’ভিড-১৯এ দেখা দিয়া সন্দৰ্ভত এটা কেন্দ্ৰীয় তদন্তকাৰী গোটে ৰাজ্য চৰকাৰক প্ৰতিবেদন দিছে।
ৰাজ্য চৰকাৰে তদন্ত প্ৰতিবেদন পৰীক্ষা কৰি আছে।
শুকুৰবাৰে ৰাজ্যখনত ক’ভিড-১৯ৰ বাবে ৮৬৯টা নমুনা পৰীক্ষা কৰা হৈছিল আৰু আটাইকেইটাই নিগেটিভ আহিছিল।
