নৰ্থ ইষ্ট ইলেক্ট্ৰিকেল পাৱাৰ ক’ৰ্পৰেশ্যন( NEEPCO)ৰ ৰঙানদীৰ বান্ধৰ পানী এৰি দিয়াৰ ফলত আজিও অপৰিৱৰ্তিত হৈ আছে লখিমপুৰৰ বান পৰিস্থিতি।
হাইড্ৰ ইলেক্ট্ৰিক প্লান্ট( RHEP)ৰ অৰুনাচল প্ৰদেশৰ য়াজালিত অৱস্থিত ৰঙানদী বান্ধৰ পানী এৰি দিয়াৰ ফলত আজি তৃতীয় দিনৰ বাবে ৰঙানদীৰ নামনি অংশ বানত বুৰ গৈয়ে আছে।
যোৱা ২৪ ঘন্টাত অবিৰতভাৱে বৰষুণৰ পৰিমাণ বৃদ্ধি পোৱাৰ ফলত আৰু ন ন অঞ্চল জলমগ্ন হোৱা পৰিলক্ষিত হৈছে।
লখিমপুৰ জিলা জৰুৰী অভিযান কেন্দ্ৰই(DEOC)ৰ এক সূত্ৰৰ মতে প্ৰথম পৰ্যায়ত যোৱা ২২ মে’ৰ পৰা শনিবাৰৰ নিশা ৯.৪০ বজালৈ অৰুনাচলত অভ্যন্তৰত থকা বান্ধটোৰ গেট খুলি পানী এৰি হৈছিল।
ইয়াৰ পিছতো অঞ্চলটোত অবিৰত বৃষ্টিপাতৰ হোৱাৰ বাবে নীপকোৱে আজি পুৱা ৫ বজাৰ পৰা ৬ বজালৈ ১৫০০ মি.মি. বান্ধৰ পানী এৰি দিয়া বুলি লখিমপুৰ DEOCএ জানিবলৈ দিয়ে।
উল্লেখ্য যে বান্ধৰ এৰি দিয়া পানী লখিমপুৰ জিলাত প্ৰৱেশ কৰিবলৈ প্ৰায় তিনি ঘণ্টা সময় লাগে।
ইতিমধ্যে ৰঙানদীৰ বান্ধৰ এই এৰি দিয়া পানীয়ে জিলাখনৰ নাওবৈচা আৰু বিহপুৰীয়া ৰাজহ চক্ৰৰ পাঁচনৈ-বৰবীল এলেকাৰ পৰা আমতল-মালুৱালৰ বিভিন্ন গাঁও প্লাৱিত কৰিছে।
লখিমপুৰ জিলা প্ৰশাসনৰ মতে জিলাখনৰ ছখন গাঁৱৰ ৩,২০৩ লোকে যোৱা ২০ বছৰ ধৰি ৰঙানদীৰ বান্ধৰ পৰা সৃষ্ট বানত আক্ৰান্ত হৈ আহিছে। প্ৰতিবাৰে এই বান্ধৰ পৰা উৎপত্তি হোৱা বানে অঞ্চলটোৰ ১৯৩.৫২ হেক্টৰ কৃষিভূমিক বুৰাই পেলায়।
উল্লেখ্য যে, শনিবাৰে জিলাখনৰ পাঁচনৈত ৰঙানদীৰ মথাউৰিৰ পাৰতে ৰঙানদী বান্ধৰ পানী এৰি দিয়াৰ বিৰুদ্ধে বনাক্ৰান্তই এক প্ৰতিবাদী কাৰ্যসূচীয়ো ৰূপায়ণ কৰে।
