আজি ৫ জুন বিশ্ব পৰিবেশ দিৱস । আজিৰ এই দিনটোতে বজালী মহকুমাৰ জালিখাটা কলিবাৰী শিৱ থানত থকা এজোপা বটবৃক্ষৰ ২০৮ বছৰীয়া জন্মদিন পালন কৰা হয়।
এছিয়া মহাদেশৰ ভিতৰত দ্বিতীয় সৰ্ববৃহৎ আৰু উত্তৰ পূৰ্বাঞ্চলৰ ভিতৰত সৰ্ববৃহৎ গছ হিচাপে স্বীকৃতি লাভ কৰা এইজোপা বটবৃক্ষক লৈ গৌৰবান্বিত সমগ্ৰ বজালীবাসী ।
বিগত বৰ্ষত আজিৰ বিশ্ব পৰিবেশ দিৱসৰ দিনাই ৬০ কেজি ওজনৰ কেক কাতি গছজোপাৰ জন্মদিন উদযাপন কৰিছিল থান পৰিচালনা সমিতিয়ে কিন্তু এইবেলি ক’ৰ’না মহামাৰীৰ সংক্ৰমণৰ বাবে চৰকাৰে জাৰি কৰা নীতি-নিৰ্দেশনাৰ বাবে অনুষ্টুপিয়াকৈ গছজোপাৰ ২০৮ বছৰীয়া জন্মদিন পালন কৰা হয় ।
কেইবাজনো বিশিষ্ট ব্যক্তিৰ লগতে অসম চৰকাৰৰ বন আৰু পৰিবেশ বিভাগৰ ব্ৰেণ্ড এম্বেচাদৰ আনন্দ খাটনিয়াৰদেৱে অনুষ্ঠানত উপস্থিত থাকি ৰাইজৰ মাজত ২০০টা গছপুলি বিতৰণ কৰে।
আনহাতে, অনুষ্ঠানত খাটনিয়াৰদেৱে এই আপুৰুগীয়া গছজোপাক পোক-পৰুৱাৰ পৰা ৰক্ষণাবেক্ষণ সন্দৰ্ভত তথা নিচেই কাষেৰে বৈ থকা কালদিয়া নৈয়ে কঢ়িয়াই অনা ভাবুকিস্বৰূপ গৰাখহনীয়া ৰোধ কৰাকে ধৰি বহুতো গুৰুত্বপূৰ্ণ কথা ৰাইজৰ লগত আলোচনা কৰি সমস্যাসমূহ মুখ্য মন্ত্ৰী সৰ্বানন্দ সোনোৱালৰ দৃষ্টিগোচৰ কৰিব বুলি ৰাইজক প্ৰতিশ্ৰুতি দিয়ে।
