বানে গৰকা চামগুৰিৰ লাওখোৱাত কৃষকৰ মাজত সীমাহীন হাহাকাৰ।
বাৰিষাৰ দ্বিতীয়টো বানে বহু কেইদিন ধৰি প্লাৱিত কৰি পেলাইছিল চামগুৰিৰ নৈপৰীয়া বৃহত্তৰ লাওখোৱা অঞ্চলৰ অধিকাংশ স্থান।
বুৰাই পেলাইছিল বিঘাই বিঘাই শস্যক্ষেত্ৰ, বিনষ্ট কৰিছিল কষ্টোপাৰ্জিত কেঁচা শাক-পাচলি তথা ফচল।
৪নং ভূৰবন্ধাৰ পৰা আৰম্ভ কৰি ৪নং ভগামুখ পৰ্যন্ত বৃহত্তৰ অঞ্চলটোত লাহে লাহে ব্ৰহ্মপুত্ৰৰ বাঢ়নী পানীৰ জলস্তৰ শাম কটাৰ পিছতহে সৰ্বত্ৰে চকুৰ সন্মুখত ভাঁহি পৰিছে কৃষক ৰাইজৰ দুৰ্দশাৰ প্ৰকৃত ছবিখন।
অসমৰ বিভিন্ন ঠাইলৈ কেঁচা শাক পাচলিৰ যোগান ধৰা নৈপৰীয়া অঞ্চলটোৰ চৌদিশে চকুৰে মনিব নোৱৰা পৰ্যন্ত কেৱল মাত্ৰ বানত বুৰি গেলি-পচী নষ্ট হোৱা শস্যৰ পথাৰবোৰ।
যাৰ বাবে এতিয়া মূৰে কপালে হাত দিব লগীয়া হৈছে নৈপৰীয়া অঞ্চলটোত প্ৰায় ৫০০ৰ পৰা ১০০০ বিঘা ভূমিত কৃষিকাৰ্য কৰি নিজৰ পৰিয়ালসমূহ পোহপাল দিয়া দৰিদ্ৰ কৃষক ৰাইজে।
বিভিন্ন বিত্তীয় প্ৰতিষ্ঠান তথা বেংকৰ পৰা ঋণ লৈ কৃষিকাৰ্য কৰা অধিকাংশ কৃষকে এতিয়া কিদৰে ঋণ পৰিশোধ কৰিব তাকলৈ চিন্তিত হৈ পৰিছে কৃষক ৰাইজ।
অহা বছৰত কেনেদৰে কৃষিকাৰ্যত বিনিয়োগ কৰিবৰ বাবে ধন যোগাৰ কৰিব তাকলৈও ঘোৰ চিন্তাত দিন পৰা কৰিছে লাওখোৱাৰ কৃষক ৰাইজে।
ইফালে সৰ্ৱস্বান্ত কৃষক ৰাইজে বান বিধ্বস্ত কৰা অঞ্চলটো সংশ্লিষ্ট বিভাগীয় মন্ত্ৰী অতুল বৰাক পৰিদৰ্শন কৰি বিহিত ব্যৱস্থা গ্ৰহণৰ জৰিয়তে দৰিদ্ৰ কৃষক ৰাইজক সকাহ প্ৰদান কৰিবলৈ আহ্বান জনাইছে সংবাদ মাধ্যমৰ জৰিয়তে।
