ইণ্ডিয়ান মেডিকেল এছ’চিয়েচনৰ অসম শাখাই ৰাজ্যত ক’ভিড-১৯ৰ ব্যৱস্থাপনাৰ ক্ষেত্ৰত চৰকাৰে শেহতীয়াকৈ ঘটোৱা নীতিৰ সালসলনিত ব্যাপক অসন্তুষ্টি প্ৰকাশ কৰিছে।
এই সন্দৰ্ভত চিকিৎসক সংস্থাটোৱে মঙলবাৰে অসমৰ স্বাস্থ্য মন্ত্ৰী হিমন্ত বিশ্ব শৰ্মালৈ এক পত্ৰ প্ৰেৰণ কৰিছে।
১১দিনৰ নিৰৱচ্ছিন্ন সেৱাৰ পিছত তিনিদিনৰ কুৱাৰেণ্টিন আৰু ক’ভিড টেষ্টত নিগেটিভ আহিলে চিকিৎসক আৰু স্বাস্থ্য কৰ্মীসকলক পুনৰ কৰ্তব্যত লগোৱাৰ বাবে চৰকাৰে দিয়া নিৰ্দেশৰ চিকিৎসক সংস্থাটোৱে প্ৰতিবাদ কৰিছে।
বেছিভাগ কেন্দ্ৰতে বাতানুকূল যন্ত্ৰ অবিহনে এই প্ৰচণ্ড গৰমত সম্পূৰ্ণ পি পি ই কিট পৰিধান কৰি ক’ভিড ৱাৰ্ডত নিৰৱচ্ছিন্নভাৱে ১১ দিন কাম কৰাতো বহুত ক্লান্তিদায়ক হ’ব, সংস্থাৰ বিবৃতিত প্ৰকাশ।
চৰকাৰৰ এই সিদ্ধান্তই আগশাৰীৰ কৰ্মীসকলৰ মনোবল ভাঙি দিব বুলি সংস্থাই আশংকা প্ৰকাশ কৰে।
তাৰোপৰি ক’ভিডৰ কৰ্তব্যত থকা স্বাস্থ্য কৰ্মীসকলৰ এণ্টিজেন টেষ্ট কৰোৱাৰ বাবে চৰকাৰে লোৱা সিদ্ধান্তৰো সংস্থাই প্ৰতিবাদ জনাইছে।
আই চি এম আৰে ইতিমধ্যে এই টেষ্টতো কম সংবেদনশীল বুলি কোৱাৰ কথা উল্লেখ কৰি সংস্থাই কয় এটা নিগেটিভ টেষ্টে ক’ভিড নাই বুলি নিশ্চিত নকৰে আৰু নিগেটিভ ষ্টেটাছ নিশ্চিত কৰাৰ বাবে এক পি চি আৰ টেষ্টৰ প্ৰয়োজন।
বৃহৎসংখ্যক চিকিৎসক আৰু স্বাস্থ্য কৰ্মী ক’ভিডৰ বলি হোৱা বুলি উল্লেখ কৰি চিকিৎসক সংস্থাটোৱে কয় যে এনে অপৰিকল্পিত আৰু অসংবেদনশীল পদক্ষেপে স্বাস্থ্য কৰ্মীসকলক অধিক বিপদগ্ৰস্ত কৰিব।
ৰোগবিধৰ সৈতে কাম কৰি থাকোতে কিয় বহুসংখ্যক স্বাস্থ্য কৰ্মী আৰু চিকিৎসক ৰোগবিধৰদ্বাৰা প্ৰভাৱিত হৈছে তাৰ এক মূল্যায়ন কৰিবলৈয়ো সংস্থাটোৱে চৰকাৰক দাবী জনায়।
লক্ষণহীন ক’ভিড ৰোগীসকলক ঘৰত চিকিৎসা কৰোৱা সন্দৰ্ভত আই চি এম আৰে দিয়া পৰামৰ্শ মানি চলিবলৈয়ো সংস্থাটোৱে চৰকাৰক পৰামৰ্শ দিছে।
সংস্থাটোৱে লগতে কয় যে ক’ভিড-১৯ ৰোগীৰ বৰ্তমানৰ উত্থানত সঠিক পৰিকল্পনা নকৰিলে পৰিস্থিতি নিয়ন্ত্ৰণ কৰাতো চৰকাৰৰ বাবে কঠিন হ’ব।
সংস্থাটোৱে কয় যে মানৱ বলৰ পৰিকল্পনা অবিহনে হস্পিটেলত বিচনা বৃদ্ধি কৰাতো নিৰৰ্থক অনুশীলন হ’ব কাৰণ চিকিৎসক আৰু স্বাস্থ্য কৰ্মীৰ ক্ষেত্ৰত আমাৰ খুব সীমিত সম্পদ আছে।
ক’ভিড-১৯এ সৃষ্টি কৰা প্ৰত্যাহ্বানৰ মুখামুখি হ’বলৈ সঠিক পৰিকল্পনাৰ বাবে অভিজ্ঞ স্বাস্থ্যসেৱাৰ পেছাদাৰী ব্যক্তি আৰু গোটসমূহক বিশ্বাসত ল’বলৈ আই এম এই চৰকাৰক আহ্বান জনাইছে।
