সমগ্ৰ বিশ্বৰ লগতে ২৯ জুলাইত বিশ্ব ঐতিহ্য ক্ষেত্ৰ কাজিৰঙাতো বিশ্ব বাঘ দিৱস উদযাপন কৰা হয়৷
কোভিড ১৯ সংক্ৰমনৰ মাজতে অনুষ্টুপীয়াকৈ আয়োজিত এই দিৱসৰ কাৰ্যসুচীত বনমন্ত্ৰী পৰিমল শুক্লবৈদ্যয়ে অংশ গ্ৰহণ কৰে৷ ৰাষ্ট্ৰীয় উদ্যানখনৰ কহঁৰাত থকা পৰমানন্দ লাহন স্মাৰক প্ৰেক্ষাগৃহত বিয়লি আয়োজিত বিশ্ব বাঘ দিৱসৰ কাৰ্যসুচীত অংশগ্ৰহণ কৰি বনমন্ত্ৰী পৰিমল শুক্লবৈদ্যই ব্ৰহ্মপুত্ৰ উপত্যকাত বাঘৰ বিৱৰ্তনৰ ওপৰত আলোকপাত কৰি বাঘ সংৰক্ষণৰ বাবে সকলোকে আহ্বান জনায়৷
অনুষ্ঠানত বনমন্ত্ৰী গৰাকীৰ উপৰিও বন বিভাগৰ প্ৰধান মুখ্য বন সংৰক্ষক তথা মুখ্য বনবল এ এম সিং , প্ৰধান মুখ্য বন সংৰক্ষক (বন্যপ্ৰাণী ) এম কে যাদৱ, অতিৰিক্ত প্ৰধান মুখ্য বন সংৰক্ষক এছ পি বৈশিষ্ট, কাজিৰঙাৰ সঞ্চালক পি শিৱকুমা, মুখ্য বন সংৰক্ষক শৈতেন্দ্ৰ সিং, বন সংৰক্ষক ক্ৰমে যতীন শৰ্মা, নাৰায়ণ মহন্ত আৰু কলিয়াবৰ মহাবিদ্যালয়ৰ অধ্যক্ষ হিৰণ্য কুমাৰ চলিহা উপস্থিত থাকে৷
অনুষ্ঠানত পুৱ অসম বন্যপ্ৰাণী সংমণ্ডলৰ ডি এফ অ’ ৰমেশ কুমা গগৈয়ে সকলোকে কাজিৰঙাৰ বিশ্ব বাঘ দিৱসৰ কাৰ্যসুচীলৈ আদৰণী জনোৱাৰ পাচতেই সঞ্চালক পি শিৱকুমাৰে বিশ্ব বাঘ দিৱসৰ তাৎপৰ্য দাঙি ধৰে৷
অনুষ্ঠানত কাজিৰঙা ৰাষ্ট্ৰীয় উদ্যানৰ গৱেষণা বিষয়া ৰবীন্দ্ৰ শৰ্মাই কাজিৰঙাত ঢেকীয়াপতীয়া বাঘৰ উপস্থিতি আৱাস আৰু বাঘৰ ভৱিষ্যতক লৈ এই সচিত্ৰ উপস্থাপন কৰে৷
এই অনুষ্ঠানতে বনমন্ত্ৰী পৰিমল শুক্লবৈদ্যই শেষতীয়া বানত কাজিৰঙাৰ হাতীখুলি চাহ বাগিছাত গঁড়ৰ আক্ৰমণত আহত হোৱা প্ৰাগ নিউজৰ কেমেৰা পাৰ্চন ভাস্কৰ জ্যোতি ৰাজখোৱাৰ চিকিৎসাৰ বাবে ৫০ হেজাৰ টকাৰ চেক আৰু হাতীৰ আক্ৰমণত নিহত হোৱা লখৌজানৰ ললিত দত্তৰ পৰিয়ালক এককালীল আৰ্থিক সাহাৰ্যৰ চেক প্ৰদান কৰে৷
নগাঁও বন সংমণ্ডলৰ বন কৰ্মীৰ মাজত এমষ্ট্ৰীপ পদ্ধতিৰে বাঘ আৰু ইয়াৰ আৱাস নিৰীক্ষণৰ বাবে বনকৰ্মীৰ মাজত উচ্চ প্ৰযুক্তিৰ ম’বাইল বিতৰণ কৰাৰ লগতে শেহতীয়া বানপানীত কাজিৰঙাৰ এনিমেল কৰিড’ৰবোৰত যানবাহনৰ গতি নিয়ন্ত্ৰণ কৰি বন্যপ্ৰাণীক ৩৭ নং ৰাষ্ট্ৰীয় পথ অতিক্ৰম কৰাত সহায় কৰা বিভিন্ন অনুষ্ঠান আৰু মহাবিদ্যালয়ৰ স্বেচ্ছাসেৱকসকলক কাজিৰঙাৰ হৈ প্ৰশস্তি পত্ৰ প্ৰদান কৰে৷
বান পানীত ঢেকীয়াপতীয়া বাঘে বাসগৃহত আশ্ৰয় লোৱা কুঠৰীৰ বাঘজানৰ প্ৰদীৰ বৰাক বাঘ উদ্ধাৰৰ বাবে বনবিভাগলৈ সহযোগিতা আগবঢ়োৱাৰ বাবে সম্বৰ্ধনা জনোৱা হয়৷
উল্লেখ্য যে বিশ্ব বাঘ দিৱসৰ লগত সংগতি ৰাখি ৰাষ্ট্ৰীয় বাঘ সংৰক্ষণ প্ৰাধিকৰণে প্ৰকাশ কৰি তথ্যত ১০৪ টা ঢেকীয়াপতীয়া বাঘৰ উপস্থিতিৰে কাজিৰঙা ৰাষ্ট্ৰীয় উদ্যান আৰু বাঘ সংৰক্ষিত বনাঞ্চলে দেশৰ ভিতৰতে তৃতীয় স্থান দখল কৰিবলৈ সক্ষম হৈছে৷
