সমগ্ৰ বিশ্বত ক’ৰণাই মহামাৰী ৰূপ ধাৰণ কৰাৰ সময়তেই দেশৰ আগশাৰীৰ তৈল প্ৰতিষ্ঠান অ’এনজিচিৰ কাণ্ডজ্ঞানহীনতাৰ বাবেই দহগৰাকীকৈ কৰ্মচাৰী ক’ভিড ১৯ত আক্ৰান্ত হৈছে।
জানিব পৰা মতে অ’এনজিচি অসম সম্পদৰ নাজিৰাৰ গেলেকী হাতিপতিস্থিত ৰিগ নম্বৰ E-1400-1ত কৰ্মৰত হেমন্ত কুমাৰ নামৰ এজন ব্যক্তিৰ শৰীৰত যোৱা ২৯ জুলাইত ক’ভিড ১৯ ধৰা পৰে।
কৰ্মচাৰীজনক চিকিৎসালয়লৈ উন্নত চিকিৎসাৰ বাবে প্ৰেৰণ কৰে যদিও অ’এনজিচি কৰ্তৃপক্ষই ৰিগটো কন্টেইনমেন্ট জ’ন হিচাপে ঘোষণা কৰাৰ পৰিৱৰ্তে অন্য কৰ্মচাৰীৰ সহায়ত খনন কাৰ্য চলায় থাকে।
দুটাদিন ধৰি ৰিগটোত কৰ্মৰত আন কৰ্মচাৰীসকলক ৰেপিড এন্টিজেন টেষ্ট কৰোৱা নাছিল অ’এনজিচিয়ে।
যোৱা ৩১ জুলাইত ৰিগটোত কৰ্মৰত কৰ্মচাৰীসকলক ৰেপিড এন্টিজেন টেষ্ট কৰোৱাত ৭জন কৰ্মচাৰীৰ শৰীৰত ক’ভিড ১৯ ধৰা পৰে।
অ’এনজিচিৰ কাৰ্যবাহী অভিযন্তা অনুপ ৰামাচন্দ্ৰন, ঘনশ্যাম নাথ (জেএআৰএম), প্ৰদীপ বৰা (জেএআৰএম), পি পি নেওগ (জেএআৰএম), গৌতম হাতীবৰুৱা (জেএআৰএম), প্ৰতীম শ্যাম সহকাৰী কাৰ্যবাহী অভিযন্তা, আৰু বিপিন চন্দ্ৰ গগৈ (এটি, ডিজেল)ৰ শৰীৰত ক’ভিড১৯ ধৰা পৰে।
আনহাতে ১ আগষ্টত ৰাকেশ নেওগ (জেএআৰএম) আৰু অভিযন্তা প্ৰণৱজিৎ দিহিঙ্গীয়াৰ শৰীৰত ক’ভিড১৯ৰ উপস্থিতি ধৰা পৰে।
এতিয়া প্ৰশ্ন হয় ২৯ জুলাইতে ৰিগটোৰ এজন কৰ্মচাৰীৰ শৰীৰত ক’ভিড১৯ ধৰা পৰাৰ পাছতো কিয় ৰিগটো কন্টেইনমেন্ট জ’ন হিচাপে ঘোষণা নকৰি দুদিন ধৰি অন্য কৰ্মচাৰীৰ সহায়ত তৈল খনন কাম কৰি আছিল অ’এনজিচিয়ে?
ইয়াৰোপৰি এক সূত্ৰৰ পৰা পোৱা অভিযোগ অনুসৰি হেমন্ত কুমাৰ নামৰ কৰ্মচাৰীজনৰ শৰীৰত ক’ভিন ১৯ ধৰা পৰাৰ পাছতো হাতীপতিস্থিত E-1400-1 নম্বৰৰ অ’এনজিচিৰ ৰিগটো আজিলৈকে কোনোধৰণৰ চেনিটাইজ কৰা নহ’ল বুলি জানিব পৰা গৈছে।
অ’এনজিচি কৰ্তৃপক্ষৰ ভুলৰ বাবে ৯জনকৈ কৰ্মচাৰী ক’ভিড ১৯ত আক্ৰান্ত হোৱা বুলি অভিযোগ উত্থাপন কৰিছে একাংশ সচেতন মহলে।
কৰ্মচাৰীৰ জীৱনৰ প্ৰতি কোনো গুৰুত্ব নিদি কেৱল মুনাফা লাভৰ বাবেই ৰিগটো কন্টেইনমেন্ট জ’ন ঘোষণা নকৰি দুদিন ধৰি তৈলখনন কৰি আছিল অ’এনজিচিয়ে।
অ’এনজিচিৰ এনে দায়িত্বজ্ঞানহীনতাক সকলোৱে একমুখে গৰিহণা দিছে।
চৰকাৰী নীতি-নিৰ্দেশনা উলংঘা কৰা অ’এনজিচিৰ বিৰুদ্ধে শিৱসাগৰ জিলা প্ৰশাসনে কি ব্যৱস্থা গ্ৰহণ কৰিব সেয়া লক্ষণীয় হ’ব।
