সুশান্ত সিং ৰাজপুতৰ আত্মহত্যাৰ ঘটনাই দুখন ৰাজ্যৰ চৰকাৰৰ মাজতো বৃদ্ধি কৰিব নেকি সংঘাত!
এই প্ৰশ্নৰ উদ্ৰেক কৰিছে সুশান্ত সিং ৰাজপুতৰ আত্মহত্যাকলৈ লোৱা মহাৰাষ্ট্ৰ আৰু বিহাৰ চৰকাৰৰ শেহতীয়া স্থিতিয়ে।
উল্লেখ্য যে, যোৱা ১৪ জুনত মুম্বাইতস্থিত ফ্লেটত সুশান্ত সিং ৰাজপুতে আত্মহত্যা কৰিছিল।
ইয়াৰ পিছতে বলিউদত তোলপাৰ লাগিছিল। সুশান্তৰ অনুৰাগীৰ লগতে দেশৰ বহু সচেতন লোকে এই আত্মহত্যাৰ তদন্তৰ দায়িত্ব চিবিআইক অৰ্পণ কৰাৰ বাবে দাবী কৰিছিল।
আনকি কেন্দ্ৰীয় গৃহ মন্ত্ৰালয়ে মহাৰাষ্ট্ৰ চৰকাৰলৈ ইয়াৰ তদন্তৰ ভাৰ চিবিআইক দিবলৈ পত্ৰ প্ৰেৰণ কৰিছিল।
ইমানৰ পিছতো মহাৰাষ্ট্ৰ চৰকাৰে মুম্বাই আৰক্ষীৰ ওপৰত আস্থা ৰাখি এই তদন্ত চিবিআইক দিয়া নহয় বুলি ঘোষণা কৰে।
ইয়াৰ পিছতে হঠাতে এই আত্মহত্যাৰ ঘটনা ক্ৰমে অন্য মোৰ লয়।
সুশান্ত সিং ৰাজপুতৰ পিতৃয়ে সুশান্তৰ চৰ্চিত প্ৰেয়সী ৰীয়া চক্ৰৱৰ্তীৰ বিৰুদ্ধে কেবাটাও অভিযোগসহ বিভিন্ন ধাৰাত পাটনাত গোচৰ ৰুজু কৰে।
এই এজাহাৰ ভিত্তিত বিহাৰ আৰক্ষীয়ে সমগ্ৰ ঘটনাৰ তদন্তৰ বাবে মুম্বাইলৈ ৰাওনা হয় আৰু এই সম্ভেদ পোৱাৰ মাত্ৰকে অভিযুক্ত ৰীয়া চক্ৰৱৰ্তীয়ে আত্মগোপন কৰে।
ইফালে মুম্বাই উপস্থিত হোৱা বিহাৰ আৰক্ষীক মুম্বাই আৰক্ষীয়ে তদন্তৰ ক্ষেত্ৰ অসহযোগ কৰাৰ অভিযোগ উত্থাপন হৈছে।
আনকি তদন্তৰ বাবে মুম্বাই উপস্থিত হোৱা বিহাৰ আৰক্ষীৰ শীৰ্ষ বিষয়াক জোৰকৈ কোৱাৰেন্টাইন কৰিছে বিএমচিয়ে।
ইয়াৰ পিছতে মুম্বাই আৰক্ষী আৰু বিহাৰ আৰক্ষীৰ মাজত ব্যৱধান বৃদ্ধি পোৱাই নহয়, জুই পক্ষৰ মাজত আৰম্ভ হৈছে শীতল বিৰোধ।
ইয়াৰ প্ৰতিফলন ঘটিছে দুই ৰাজ্যৰ ৰাজ্য চৰকাৰৰ মাজতো।
ইফালে মুম্বাই আৰক্ষীয়ে তদন্তৰ নামত একোৱেই কৰা নাই বুলি অভিযোগ তুলি পুনৰ এই ঘটনাৰ তদন্ত চিবিআইক দিয়াৰ দাবী উত্থাপন কৰিছে সুশান্তৰ পিতৃ কে কে সিঙে।
ইয়াৰ পিছতে বিহাৰৰ মুখ্যমন্ত্ৰী নীতিশ কুমাৰে সুশান্ত সিং ৰাজপুতৰ আত্মহত্যাৰ তদন্ত চিবিআইক দিবলৈ অনুমোদন দিয়াৰ কথা ঘোষণা কৰিছে।
এক ৰাষ্ট্ৰীয় পৰ্যায়ৰ সংবাদ চেনেলক মুখ্যমন্ত্ৰী নীতিশ কুমাৰে কয়, “সুশান্তৰ পৰিয়ালে সন্মতি দিছে আৰু বিহাৰত ৰুজু কৰাৰ এজাহাৰৰ ভিত্তিতে চিবিআইক তদন্ত কৰিবলৈ অনুমোদন দিয়া হৈছে।”
উল্লেখ্য যে দুয়োখন ৰাজ্যৰ ৰাজ্য চৰকাৰ তথা আৰক্ষীৰ বিপৰীত মেৰুৱে সুশান্ত সিং ৰাজপুতৰ আত্মহত্যাৰ তদন্তক কেনেকৈ সম্পূৰ্ণ কৰে সেয়া লক্ষণীয় হ’ব।
