নগৰ সমিতিৰ পৰা পৌৰসভালৈ উন্নীত হোৱা বোকাখাত পৌৰসভাক ১৯৫৬ চনত গৃহীত অসম পৌৰ নিগম আইনৰ ৪নং দফাৰ ১নং উপদফাৰ খ অনুচ্ছেদ অনুসৰি পূৰ্বৰ চাৰিটা ৱাৰ্ডৰ পৰা দহটা ৱাৰ্ডলৈ উন্নীত কৰাৰ খচৰা জাননী প্ৰকাশিত হৈছে৷
যোৱা ৫ আগষ্টত অসম চৰকাৰৰ নগৰ উন্নয়ন বিভাগে প্ৰকাশ কৰা UDD(M)100/2020/21 নিৰ্দেশ অনুসৰি এই খচৰা প্ৰস্তুত কৰি বোকাখাতৰ নাগৰিকৰ বাবে প্ৰকাশ কৰিছে৷
এই খচৰা জাননী মতে বোকাখাত পৌৰসভাৰ ১নং ৱাৰ্ডৰ পূৰ্বৰ সীমাৰ সৈতে উত্তৰে ধনশিৰিমুখ পথৰ মৰিধনশিৰি দলঙলৈকে প্ৰসাৰিত হ’ব৷
২নং ৱাৰ্ডৰ পূৰ্ব পৰিসৰৰ লগতে পশ্চিমলৈ প্ৰসাৰিত হৈ ক’লাখোৱা গাওঁ আৰু দক্ষিণে কৈল্যাণপুৰকো সামৰিব৷
৩নং ৱাৰ্ডৰ পৰিসৰ উত্তৰৰ চাপৰি গাওঁ পথলৈকে প্ৰসাৰিত হ’ব৷ ৪নং ৱাৰ্ড পূবলৈ নাহৰজান তিনিআলি হৈ নাহৰজান ৰোড পাবগৈ৷
৫নং ৱাৰ্ডে পূৰ্বৰ পৰিসৰৰ লগতে কৰৈআটি গাওঁকো সামৰিব৷ খচৰা জাননীৰ মতে ৬নং ৱাৰ্ডে বালিজান গাওঁ আৰু কলাখোৱা গাঁৱৰ একাংশ সামৰিব৷
৭নং ৱাৰ্ডৰ পৰিসৰে বালিজান আৰু কলাখোৱা গাঁৱৰ দক্ষিণাংশ সামৰিব৷
৮নং ৱাৰ্ডে ম’হ মাইকী গাওঁৰ দক্ষিন পশ্চিমাংশ আৰু ৯নং ৱাৰ্ডে উক্ত গাওঁৰে দক্ষিন পুৱ অংশক সামৰাৰ বিপৰীতে প্ৰস্তাৱিত ১০নং ৱাৰ্ডে ৩নং দ গাওঁহৈ পুৱৰ ইকৰাজানলৈকে সামৰিব৷
নগৰ উন্নয়ন বিভাগৰ সচিব ৰবিনচন মুচাহাৰীয়ে স্বাক্ষৰ কৰা এই খচৰা জাননী মতে খচৰাৰ ওপৰত কাৰোবাৰ আপত্তি থাকিলে জাননী জাৰি কৰাৰ পৰা ৪২ দিনৰ ভিতৰত জিলা উপায়ুক্তৰ জড়িয়তে অসম চৰকাৰক জনাব পাৰিব৷
উল্লেখ্য যে ২০১৭ চনৰ ৩০ অক্টোবৰত চৰকাৰী জাননীৰে বোকাখাত নগৰ সমিতিক পৌৰসভালৈ উন্নীত কৰা হৈছিল৷
সদ্য প্ৰকাশিত প্ৰস্তাৱিত খচৰা মতে বোকাখাত পৌৰসভাৰ ১০ ৱাৰ্ডে পৌৰসভা এলেকাৰ ২১ হেজাৰ জনসংখ্যাক সামৰিব৷
