বোকাখাতত শুকুৰবাৰে পুৱাই সংঘটিত হয় এক জঘন্য কাণ্ড৷ এখন চলন্ত আল্ট্ৰা বাছৰ পৰা হেণ্ডিমেনে ঠেলা মাৰি এগৰাকী মহিলাক পেলাই দিয়া ঘটনাই ৰাজ্যজুৰি চাঞ্চল্যৰ সৃষ্টি কৰিছে।
মহিলা গৰাকীক ঠেলা মাৰি বাছখন পলাই যাবলৈ সক্ষম হয় যদিও কিছু সময় পিছতে কহঁৰা আৰক্ষীয়ে বাছখন জব্দ কৰে৷
গোলাঘাটৰ পৰা নগাঁৱলৈ বুলি অহা এ এছ ০৫ চি – ৫০৮৩ নম্বৰৰ মুচফিক নামৰ আল্ট্ৰা বাছখনত জামিনা বেগম নামৰ মহিলা গৰাকী বোকাখাতলৈ বুলি উঠি আহিছিল৷
বোকাখাতৰ মিলনপুৰ নিৱাসী মহিলা গৰাকীৰ হাতত ভাড়া নথকাত বোকাখাতত ৩৭ নং ঘাইপথৰ কাষতে থকা ঘৰৰ পৰা পইচা লৈ ভাড়া পৰিশোধ কৰাৰ কথা বাছৰ পৰিচালকক কৈছিল যদিও ভাড়া বিচাৰি মহিলা গৰাকীক ওৰেটো বাট ব্যতিব্যস্ত কৰিছিল বাছখনৰ পৰিচালক আৰু হেণ্ডিমেনে৷
বোকাখাতৰ মিলনপুৰৰ ওচৰত বাছখন ৰখাবৰ বাবে মহিলা গৰাকীয়ে কোৱাৰ পাছতো বাছখন নৰখোৱাৰ বাবে মহিলা গৰাকী গাড়ীৰ দৰ্জাৰ কাষলৈকে আহে৷
মিলনপুৰৰ নিজৰ বাসগৃহৰ পৰা প্ৰায় এক কিলোমিটাৰ পথ অতিক্ৰম কৰি লতাবাৰীৰ ওচৰত মহিলা গৰাকীক চলন্ত অৱস্থাতেই ঠেলা মাৰি পেলাই দিয়ে আল্ট্ৰা বাছখনৰ হেণ্ডিমেন জনে৷
মহিলা গৰাকীক পেলায়েই বাছখনে পলায়ন কৰে যদিও কহঁৰা আৰক্ষীয়ে আল্ট্ৰা বাছখনক জব্দ কৰি বোকাখাত আৰক্ষীক গতাই দিয়ে৷
ইফালে গুৰুতৰভাৱে আহত মহিলাগৰাকীক ১০৮ সেৱাৰে বোকাখাতৰ ছহিদ কমলামিৰি অসামৰিক চিকিৎসালয়ত ভৰ্তি কৰোৱা হয়৷
