আজি আবেলি আনুমানিক ২.১৫ বজাত বঙাইগাঁও জিলাৰ মাণিকপুৰ আৰক্ষী থানাৰ অন্তৰ্গত ৩১নং ৰাষ্ট্ৰীয় ঘাইপথৰ মানাহ নদীৰ ওপৰত থকা দলংত ভয়াবহ পথ দুৰ্ঘটনা সংঘটিত হয়।
দুৰ্ঘটনাত শিশু, মহিলাসহ তিনিজন বাইক আৰোহী থিতাতে নিহত হয়।
জানিব পৰা মতে নিহতত্ৰয় বঙাইগাওঁ জিলাৰ মাণিকপুৰ আৰক্ষী থানাৰ অন্তৰ্গত ৩নং ছালাবিলা গাঁৱৰ আক্কাচ আলী (৬৫), পত্নী হাওৱা বিবি (৫০) আৰু নাতিনী ৰোচলিনা আহমেদ(৮) একেলগে AS 19 B 7361নং মটৰ চাইকেলৰে হাপাচাৰা (গৰৈমাৰী)লৈ গৈ থকা অৱস্থাত দলঙৰ মাজত ভয়াবহ দুৰ্ঘটনাটো সংঘটিত হয়।
প্ৰত্যক্ষদৰ্শীৰ মতে একে দিশত তীব্ৰ গতিত গৈ থকা তেলৰ টেংকাৰে পিছৰ পৰা মহতিয়াই নিয়াৰ ফলত তিনিগৰাকী বাইক আৰোহী থিতাতে নিহত হয়।
দুৰ্ঘটনা সংঘটিত কৰা গাড়ী পলায়নৰ চেষ্টা কৰিবলৈ চেষ্টা কৰে যদিও গেৰুকাবাৰী আৰক্ষীয়ে দুৰ্ঘটনা সংঘটিত কৰা টেংকাৰখন জব্দ কৰিবলৈ সক্ষম হৈছে বুলি জানিব পৰা গৈছে।
স্থানীয় ব্যক্তি সকলোৰ মতে ৰাষ্ট্ৰীয় ঘাইপথটোৰ মাজে মাজে উপপথ আছে আৰু মাজে মাজে নাই সেই বাবে প্ৰায়ে সংঘটিত হয় ভয়াবহ দুৰ্ঘটনা।
ঘটনাস্থলীত মাণিকপুৰ আৰক্ষী থানাৰ আৰক্ষীৰ এটা দল উপস্থিত হোৱাৰ লগতে উচ্চ পৰ্যায়ৰ আৰক্ষী বিষয়াৰ উপস্থিতিত পৰিস্থিতি নিয়ন্ত্ৰণ কৰে আৰু মৰণোত্তৰ পৰীক্ষাৰ বাবে মৃতদেহ তিনিটা চমজি লয়।
ঘটনাটোত মাণিকপুৰ, ছালাবিলা অঞ্চলত শোকৰ ছাঁ পৰিছে। স্থানীয় ৰাইজে পৰিয়াটোক দহ লাখকৈ টকা সাহায্য দিবলৈ দাবী জনাইছে।
