ভাৰত, অষ্ট্ৰেলিয়া, জাপান আৰু আমেৰিকা যুক্তৰাষ্ট্ৰৰ শীৰ্ষস্থানীয় নেতৃত্বই অহা সপ্তাহত জাপানৰ ৰাজধানী টকিঅ’ত এক আলোচনাত অংশগ্ৰহণ কৰিব।
চাৰিওখন দেশৰ প্ৰতিনিধিয়ে কোভিড-১৯ৰ বিৰুদ্ধে যুঁজাৰ ক্ষেত্ৰত সহযোগিতা আদি দিশৰ ক্ষেত্ৰত আলোচনাত মিলিত হ’ব বুলিও জাপানৰ বৈদেশিক মন্ত্ৰী ট’ছিমিছু মোটেগীয়ে কয়।
আনহাতে, ভাৰত, অষ্ট্ৰেলিয়া, জাপান আৰু আমেৰিকা যুক্তৰাষ্ট্ৰৰ মাজত অনুষ্ঠিত হ’বলগীয়া এই বৈঠকত জাপানৰ বৈদেশিক মন্ত্ৰীৰ উপৰিও আমেৰিকাৰ চেক্ৰেটাৰী অফ ষ্টেট মাইক পম্পেয়ো, অষ্ট্ৰেলিয়াৰ বৈদেশিক মন্ত্ৰী মাৰিছ পাইন আৰু ভাৰতৰ বৈদেশিক মন্ত্ৰী এছ জয়শংকৰে অংশগ্ৰহণ কৰিব ।
উল্লেখযোগ্য যে, ভাৰত আৰু চীনৰ মাজত লাডাখ সীমান্তত উত্তেজনাই বিৰাজ কৰি থকাৰ সময়ত ভাৰত, আমেৰিকা, জাপান আৰু অষ্ট্ৰেলিয়াৰ মাজত অনুষ্ঠিত হ’বলগীয়া এই বৈঠকে যথেষ্ট তাৎপৰ্য্য বহন কৰিছে।
ইয়াৰ পূৰ্বেও আমেৰিকা আৰু ভাৰতৰ তৰফৰ পৰা এই চাৰিখন দেশৰ মাজত থকা কোৱাড গ্ৰুপৰ সক্ৰিয়তা বৃদ্ধিৰ ক্ষেত্ৰত গুৰুত্ব আৰোপ কৰা হৈছিল।
