ত্ৰিপুৰা চৰকাৰে ১ অক্টোবৰৰ পৰা ৰাজ্যখনৰ সকলো পৰ্যটন স্থান পৰ্যটক সকলৰ বাবে পুনৰ মুকলি কৰি দিয়াৰ সিদ্ধান্ত গ্ৰহণ কৰিছে।
ত্ৰিপুৰাৰ পৰ্যটন মন্ত্ৰী প্ৰাণজিৎ সিংহ ৰয়ে মঙলবাৰে সংবাদ মাধ্যমক সম্বোধন কৰি এই কথা ঘোষণা কৰে।
ক’ৰ’না মহামাৰীৰ সংক্ৰমণৰ বাবে ত্ৰিপুৰাৰ সকলো পৰ্যটন স্থান বিগত মাৰ্চ মাহৰ পৰা বন্ধ কৰি ৰখা হৈছিল।
ত্ৰিপুৰাৰ অৰ্থনীতি বহু পৰিমাণে পৰ্যটন ক্ষেত্ৰৰ ওপৰত নিৰ্ভৰ কৰে যাৰ বাবে ত্ৰিপুৰা চৰকাৰে অক্টোবৰৰ ১ তাৰিখৰ পৰা ৰাজ্যখনৰ পৰ্যটন স্থান সমূহ পুনৰ মুকলি কৰাৰ সিদ্ধান্ত গ্ৰহণ কৰে।
যিসকল লোকৰ জীৱন আৰু জীৱিকা পৰ্যটন ক্ষেত্ৰত ওপৰত নিৰ্ভৰশীল সেইসকল লোক ক’ৰ’না মহামাৰীৰ সময়ত যথেষ্ট সমস্যাৰ সন্মুখিন হ’বলগীয়া হৈছে।
পৰ্যটন ক্ষেত্ৰখনক কোভিডৰ সময়ত পুনৰ উজ্জীৱিত কৰি তোলাৰ লক্ষ্যৰে ত্ৰিপুৰা চৰকাৰে নিৰ্দিষ্ট নীতি-নিয়মেৰে সাজু হোৱা দেখা গৈছে।
উল্লেখযোগ্য যে, ত্ৰিপুৰাৰ লগতে ওড়িশা, মেঘালয় আদি ৰাজ্যয়ো অক্টোবৰৰ পৰা ৰাজ্যসমূহৰ পৰ্যটনস্থান সমূহ পুনৰ পৰ্যটক সকলৰ বাবে মুকলি কৰাৰ বাবে সিদ্ধান্ত গ্ৰহণ কৰিছে।
