অসমৰ লোক তথা যানবাহন মেঘালয়ত প্ৰৱেশত বাধা আৰোপ কৰা মেঘালয় চৰকাৰ আৰু প্ৰশাসনৰ বিৰুদ্ধে জাঙুৰ খাই উঠিছে আছু, কৃষক মুক্তি, আমছু, এবছুকে ধৰি অসমৰ ৪০ টাকৈ দল-সংগঠন ৷
মেঘালয় চৰকাৰ-প্ৰশাসনক তিনিদিনৰ সময়সীমা বান্ধি দি ইয়াৰ অন্যথা অর্থনৈতিক পথ অৱৰোধ কৰাৰ হুংকাৰ দিছে অসমৰ সংগঠনকেইটাই ৷
সমগ্ৰ দেশত আনল’ক প্ৰক্ৰিয়াৰ জৰিয়তে ইতিমধ্যে আন্তঃৰাজ্যিক যাতায়তৰ ক্ষেত্ৰত থকা নিষেধাজ্ঞা উঠাই লোৱা হৈছে যদিও মেঘালয় চৰকাৰে অসমৰ সকলো ধৰণৰ যানবাহন মেঘালয়ত প্ৰবেশৰ ক্ষেত্ৰত এতিয়াও বাধা নিষেধ আৰোপ কৰি আছে ৷
ইয়াৰ ফলত জিলাখনৰ দুধনৈ, কৃষ্ণাই, দৰংগিৰী, ধূপধৰা তথা অসম-মেঘালয় সীমান্তৱর্তী পথেৰে অহা যোৱা কৰা যাত্ৰীবাহী বাছ, মালবাহী ট্ৰাক, উইংগাৰ, টেক্সি, অটোৰ উপৰি ব্যবসায়ীসকলে যথেষ্ট সমস্যাৰ সন্মুখীন হবলগীয়া হৈছে৷
মেঘালয় চৰকাৰৰ যাতায়তৰ এই বাধা আৰোপৰ ব্যৱস্থাত জাঙুৰ খাই উঠিছে গোৱালপাৰা জিলাৰ চল্লিশটাকৈ সংগঠন।
এই সন্দৰ্ভত দুধনৈ টেক্সী সন্থাৰ আহ্বানমৰ্মে শুকুৰবাৰে দুধনৈ জনমন্দিৰ প্ৰাঙ্গণ ভৱনত এখন সভা অনুষ্ঠিত হয় ৷ সভাত কেবাটাও ছাত্ৰ সংগঠনসহ চল্লিশটাকৈ সংগঠন একত্ৰিত হৈ মেঘালয় চৰকাৰ-প্ৰশাসনক আগন্তুক ৭২ ঘণ্টাৰ ভিতৰত যদি আন্তঃৰাজ্যিক যাতায়াত সমস্যাৰ সমাধান নকৰে তেন্তে মেঘালয়ৰ বিৰুদ্ধে অৰ্থনৈতিক অৱৰোধ কাৰ্যসূচী গ্ৰহণ কৰাৰ সকীয়নি প্ৰদান কৰে ।
উল্লেখযোগ্য মেঘালয় চৰকাৰে কোভিড সংক্ৰমণৰ দোহাই দি অসমৰ লোকক মেঘালয়ত প্ৰবেশ কৰিবলৈ বাধা দি আহিছে অথচ মেঘালয়ৰ যিকোনো লোকে কোনো বাধা নোহোৱাকৈ অসমত প্ৰৱেশ কৰি আহিছে আৰু উভটি গৈছে।
এই সমস্যা সন্দৰ্ভত কেবাটাও সংগঠনে ইতিমধ্যে স্মাৰক পত্ৰ গোৱালপাৰা জিলা উপায়ুক্তলৈ প্ৰেৰণ কৰিছিল। কিন্তু মেঘালয় তথা অসম চৰকাৰে এই সমস্যা সমাধানৰ ক্ষেত্ৰত কোনো সঁহাৰি নিদিয়া বুলি সভাত গুৰুতৰ অভিযোগ উত্থাপন হয়।
চৰকাৰে এই সমস্যা সমাধান নকৰাত ক্ষোভ প্ৰকাশ কৰে সদৌ গোৱালপাৰা জিলা ছাত্ৰ সন্থাৰ উপৰি জিলা বাঙালী ফেডাৰেচন, আমছু, এবছু সহ ৪০টাকৈ সংগঠনে ৷
