উৎসৱৰ বতৰতে সাধাৰণ নাগৰিকৰ বাবে এটা বেয়া খৱৰ। শীঘ্ৰেই ATMৰ পৰা টকা উলিওৱাবলৈ গ’লে গ্ৰাহকে ভৰিবলগীয়া হ’ব পাৰে অতিৰিক্ত চাৰ্জ।
বাতৰি অনুসৰি, ৫,০০০টকাৰ ওপৰত টকা উলিয়ালে গ্ৰাহকে অতিৰিক্ত চাৰ্জ দিবলগীয়া হ’ব পাৰে।
সূত্ৰ অনুসৰি, ATMৰ পৰা টকা উলিওৱাৰ নিয়ম সলনি কৰাৰ প্ৰস্তুতি পূৰ্ণ গতিত চলিছে।
বৰ্তমান গ্ৰাহকসকলে মাহত পাঁচবাৰলৈকে বিনামূলীয়াকৈ ATMৰ পৰা টকা উলিয়াব পাৰে। প্ৰস্তাৱিত নতুন নিয়মত ইয়াৰ কোনো সলনি নহয় বুলি কোৱা হৈছে। আগলৈকো গ্ৰাহকে মাহত পাঁচবাৰলৈকে বিনামূলীয়াকৈ ATMৰ পৰা টকা উলিয়াব পাৰিব।
কিন্তু ATMৰ পৰা একেলগে ৫,০০০টকাৰ অধিক উলিয়ালে সুকীয়াকৈ চাৰ্জ ভৰিবলগীয়া হ’ব পাৰে।
ৰিজাৰ্ভ বেংক অফ ইণ্ডিয়াক এনে পৰামৰ্শ দিয়া হৈছে বুলি জানিব পৰা গৈছে।
ৰাষ্ট্ৰীয় সংবাদ মাধ্যমত প্ৰকাশ পোৱা বাতৰি অনুসৰি, ATMৰ পৰা ৫,০০০টকাৰ বেছি উলিয়ালে গ্ৰাহকে ২৪টকা অতিৰিক্ত চাৰ্জ দিবলগীয়া হ’ব পাৰে।
চলিত নিয়ম অনুসৰি মাহত গ্ৰাহকে পাঁচবাৰতকৈ অধিক ATMৰ পৰা টকা উলিয়ালে বেংকক অতিৰিক্ত ২০টকা চাৰ্জ ভৰিব লাগে।
ATMৰ পৰা টকা উলিওৱাৰ নিয়ম সম্পৰ্কে পৰ্যালোচনা কৰাৰ বাবে ভাৰতীয় ৰিজাৰ্ভ বেংকে এখন কিমিট গঠন কৰি দিছিল।
উক্ত কমিটিৰ পৰামৰ্শ অনুসৰি এইবাৰ এনে নিয়ম সলনি হ’বলৈ আগবাঢ়িছে। অৱশ্যে, এই প্ৰতিবেদন আৰবিআইয়ে আনুষ্ঠানিকভাৱে প্ৰকাশ কৰা নাই।
কিন্তু তথ্য জনাৰ অধিকাৰ আইনৰ অধীনত দাখিল কৰা এখন আবেদনৰ সন্দৰ্ভত উচ্চতম ন্যায়ালয়ে এই তথ্য সদৰী কৰিছে।
ATMৰ পৰা টকা উলিওৱাৰ চাৰ্জৰ বিষয়ে পৰ্যালোচনাৰ বাবে ইণ্ডিয়ান বেংক এছোচিয়েশ্যনৰ মুৰব্বী ভি জি কন্নানৰ নেতৃত্বত গঠন কৰি দিয়া কমিটিখনে যোৱা বছৰৰ ২২ অক্টোবৰত ইয়াৰ প্ৰতিবেদন দাখিল কৰিছিল। সেই প্ৰতিবেদন এতিয়া ৰাজহুৱা কৰা হোৱা নাই।
কিন্তু এই কমিটি সম্পৰ্কত বিভিন্ন তথ্য জানিবলৈ শ্ৰীকান্ত এল নামৰ এগৰাকী ব্যক্তিয়ে আৰ টি আই কৰিছিল। এই আৰটিআইৰ উত্তৰত ৰিজাৰ্ভ বেংকে কন্নান কমিটিৰ প্ৰতিবেদনত আগবঢ়োৱা প্ৰস্তাৱ সম্পৰ্কে অৱগত কৰে য’ত ৫,০০০টকাৰ ওপৰত উইড্ৰ’লৰ ক্ষেত্ৰত অতিৰিক্ত চাৰ্জ লগোৱাৰ কথাটোও আছে।
