মাৰ্কিন ৰাষ্ট্ৰপতিৰ নিৰ্বাচনৰ দিন তেনেই চমু চাপি আহিছে।
এনে সময়তে বিশ্বৰ সংবাদ মাধ্যমৰ শিৰোনাম দখল কৰিবলৈ সক্ষম হৈছে আমেৰিকাৰ এটা বিশেষ অঞ্চলে।
এই অঞ্চলত বাস কৰা লোকসকলে বছৰৰ ১২ টা মাহেই পানীৰ সৈতে সহাৱস্থান কৰি আহিছে।
আমেৰিকাৰ ভাৰ্জিনিয়া প্ৰদেশৰ অন্তৰ্গত টেনজিয়েৰ দ্বীপত মাটি বুলি ক’বলৈ কোনো বস্তু নাই বুলি ক’লেও হয়তো ভুল কোৱা নহ’ব।
মাটিৰ চিন-মোকাম নথকা দ্বীপটোত জনসংখ্যাও কম নহয়।
দ্বীপটোত কোনোৱাই জাহাজৰ ওপৰতে অথবা পানীৰ মাজতে ঘৰ সাজি বাস কৰি আহিছে।
টেনজিয়েৰ দ্বীপ এটা সময়ত গছ-গছনি আৰু সাৰুৱা মাটিৰে পৰিপূৰ্ণ দ্বীপ আছিল।
কিন্তু গোলোকীয় উষ্ণতা বৃদ্ধিৰ ফলত মেৰুৰ বৰফ গলি সাগৰৰ জল স্তৰ ওপৰলৈ উঠি অহাৰ ফলত টেনজিয়েৰ দ্বীপটো পানীৰে ভৰি পৰিছে।
গোলকীয় উষ্ণতা বৃদ্ধিৰ ভয়াৱহ ছবি খন বিশ্ববাসীৰ চকুৰ সন্মুখত দাঙি ধৰা টেনজিয়েৰ দ্বীপৰ বাসিন্দাসকলে এইবাৰ ভোট দিব ট্ৰাম্পকেই।
কাৰণ ট্ৰাম্পে তেওঁলোকক কথা দিছে দ্বীপটোৰ ভিতৰলৈ সাগৰৰ পানী সোমাই অহাত বাধা দিবলৈ এখন বৃহৎ দেৱাল সাজি দিয়াৰ।
ট্ৰাম্পে টেনজিয়েৰ দ্বীপৰ কথা বিভিন্ন নিৰ্বাচনী ভাষণতো উল্লেখ কৰি আহিছে।
