ভাৰতীয় ছবিজগতৰ প্ৰবীণ অভিনেতা তথা চলচ্চিত্ৰ নিৰ্মাতা নানা পাটেকাৰৰ বৃহস্পতিবাৰে পুৱা গোৱাৰ বাসভৱনত দেহাৱসান ঘটে। মৃত্যুৰ সময়ত তেওঁৰ বয়স আছিল ৭৫ বছৰ। চিকিৎসালয় কৰ্তৃপক্ষই জানিবলৈ দিয়া মতে, গুৰুতৰভাৱে হৃদৰোগত আক্ৰান্ত হোৱা প্ৰখ্যাত অভিনেতাগৰাকীক পুৱা ৫:২০ বজাত মৃত ঘোষণা কৰা হয়।
গোৱাৰ মণিপাল হাস্পতালৰ সূত্ৰই প্ৰকাশ কৰা মতে, অভিনেতাগৰাকীক অচেতন অৱস্থাত চিকিৎসালয়লৈ অনাৰ পাছত চিকিৎসকৰ দলে প্ৰায় ৪৫ মিনিট ধৰি ‘চিপিআৰ’ (CPR) প্ৰদান কৰি তেওঁৰ হৃদস্পন্দন ঘূৰাই আনিবলৈ অহোপুৰুষাৰ্থ চলাইছিল যদিও তেওঁৰ পৰা কোনো সঁহাৰি পোৱা নগ’ল। মণিপাল হাস্পতালৰ অনক’লজী বিভাগৰ প্ৰধান ডাঃ শেখৰ চালকাৰে সংবাদ সংস্থা এএনআইক জানিবলৈ দিয়া মতে, “ক্ৰমাগত ৪৫ মিনিট ধৰি চিপিআৰ দিয়াৰ পাছতো তেওঁক পুনৰুজ্জীৱিত কৰিব পৰা নগ’ল। ইতিমধ্যে এটা মেডিক’-লিগেল কেচ (MLC) পঞ্জীয়ন কৰা হৈছে আৰু যাৱতীয় নিয়ম অনুসৰি মৰণোত্তৰ পৰীক্ষা সম্পন্ন কৰা হ’ব।”তিনিবাৰকৈ ৰাষ্ট্ৰীয় চলচ্চিত্ৰ বঁটা লাভ কৰা নানা পাটেকাৰে ১৯৭৮ চনৰ ছবি ‘গমন’ৰ জৰিয়তে বলীউডত আত্মপ্ৰকাশ কৰিছিল। সুদীৰ্ঘ অভিনয় জীৱনত তেওঁ ‘পৰিন্দা’, ‘ক্ৰান্তিৱীৰ’, ‘নাটসম্ৰাট’, ‘ৱজুদ’, ‘অপহৰণ’, ‘আব তক চপ্পন’ আৰু ‘যশোৱন্ত’ৰ দৰে বহুকেইখন কালজয়ী ছবিত বলিষ্ঠ অভিনয় কৰি দৰ্শকৰ মনত এক সুকীয়া স্থান দখল কৰিছিল। ২০০০ চনৰ সময়ছোৱাত ‘শক্তি: দ্য পাৱাৰ’ (২০০২), ‘ট্যাক্সি নং ৯২১১’ (২০০৬) আদি ছবিত অনবদ্য অভিনয়ৰ সমান্তৰালকৈ জনপ্ৰিয় কমেডী ছবি ‘ৱেলকাম’ (২০০৭) আৰু ‘ৱেলকাম বেক’ (২০১৫)ত গেংষ্টাৰ ‘উদয় শেট্টী’ চৰিত্ৰত অভিনয় কৰি সকলো শ্ৰেণীৰ দৰ্শকৰ বিপুল সমাদৰ লাভ কৰিছিল।
স্বকীয় সংলাপ প্ৰক্ষেপণ আৰু ভাবগধুৰ অভিনয়শৈলীৰে মাৰাঠী আৰু হিন্দী চলচ্চিত্ৰত যুগান্তকাৰী প্ৰভাৱ পেলোৱা এইগৰাকী মহীৰূহ অভিনেতাৰ আকস্মিক বিয়োগত সমগ্ৰ দেশৰ সাংস্কৃতিক মহল আৰু গুণমুগ্ধসকলৰ মাজত গভীৰ শোকৰ ছাঁ পৰিছে। তেওঁৰ নশ্বৰ দেহৰ মৰণোত্তৰ পৰীক্ষাৰ পাছত পৰিয়ালৰ সদস্যসকলৰ উপস্থিতিত শেষকৃত্য সম্পন্ন কৰা হ’ব বুলি জানিব পৰা গৈছে।
