মিঞা মিউজিয়াম সন্দৰ্ভত বিতৰ্কিত মন্তব্য কৰা কংগ্ৰেছী বিধায়ক শ্বেৰমান আলীলৈ নামি আহিব নেকি বিপদ?
জনতা ভৱনত সম্বোধন কৰা এক সংবাদমেলত তাৰেই এক ইংগিত দিলে মন্ত্ৰী ডঃ হিমন্ত বিশ্ব শৰ্মাই।
“চৰকাৰ আহিলেই শ্বেৰমান আলী জেইলত যাব। তেওঁ আৰু কেতিয়াও ওলাবই নোৱাৰিব।” এই সদম্ভ ঘোষণা মন্ত্ৰী হিমন্ত বিশ্ব শৰ্মাৰ।
তেওঁ আৰু কয় “তেওঁ শ্ৰীমন্ত শংকৰদেৱ কলাক্ষেত্ৰত মিঞা লুঙী ৰাখিম বুলি কৈছে। এই অপমান সহ্য কৰিব নোৱাৰি। ধেমালি নেকি এয়া?”
অৱশ্যে লুঙীৰ পৰিৱৰ্তে মাছ ধৰা সঁজুলি যেনে জাকৈ, খালৈ আদি ৰাখিলে শুনিবলৈ ভাল বুলি মন্ত্ৰীগৰাকীয়ে কয়।
“কোনোবাই ক’ব নেকি মোৰ আন্দাৰৱেৰটো নি অমুকত ৰাখিমগৈ? এইকেইদিন ৰাজনৈতিক নকৰো। বিষয়টো কিয়নো, এইবোৰ কৰিলে তেওঁ ভোট বেছি পাব। কিন্তু তেওঁৰ স্থান জেইলত হ’ব লাগিব। শংকৰদেৱ কলাক্ষেত্ৰত লুঙী ৰাখিম কোৱাটো গ্রহণযোগ্য নহয়।” হিমন্তই এইদৰে কয়।
ইপিনে এই বিষয় লৈ বুদ্ধিজীৱীসকল কিয় মনে মনে আছে বুলি প্ৰশ্ন কৰি হিমন্তই লগতে কয় “তেওঁলোকৰ ইচ্ছা প্ৰৱণতা ক’ত আছে নাজানো। অসমৰ মানুহৰ দাবী, নিৰ্বাচনৰ পাছতে শ্বেৰমান জেইললৈ যাবই লাগিব।”
“আজি কামাখ্যা মন্দিৰ বা দেৱীৰ ফটো এখন শংকৰদেৱ কলাক্ষেত্ৰত ৰাখকগৈ বুলি কোনোবাই ক’ব নেকি? বলি দিয়া শালখন নি অমুকত ৰাখকগৈ বুলি ক’ব নেকি?” হিমন্তই এইদৰে কয়।
