সাহিত্যানুৰাগী তথা সৰবৰহী মহিলা পুষ্পাদেৱী জালানৰ সোঁৱৰণত নৱমবাৰৰ বাবে সাহিত্য বঁটা প্ৰদান কৰা হয়।
গুৱাহাটী প্ৰেছ ক্লাবত মংগলবাৰে দিনৰ ১১.৩০ বজাত অনুষ্ঠিত এখন গাম্ভীৰ্যপূৰ্ণ সভাত এই বঁটা প্ৰদান কৰা হয় বিশিষ্ট লেখিকা ডঃ ৰাজশ্ৰী বৰাক।
উল্লেখ্য যে গুৱাহাটীস্থিত বিশাল প্ৰকাশনৰপৰা প্ৰকাশিত ভাষা-সাহিত্য-সংস্কৃতিৰ পূৰ্ণাংগ আলোচনী ‘মাহেকীয়া বাৰ্তাপখিলী’য়ে ২০১২ চনৰপৰা চল্লিশোধৰ্ৰ লেখিকাক সৰবৰহী মহিলা পুষ্পাদেৱী জালানৰ সোঁৱৰণত সাহিত্য প্ৰতিযোগিতা অনুষ্ঠিত কৰি অহা হৈছে। এই প্ৰতিযোগিতাত চল্লিশোৰ্ধৰ লেখিকা এগৰাকীৰ শ্ৰেষ্ঠ প্ৰবন্ধ সংকলনখন নিৰ্বাচকমণ্ডলীৰ দ্বাৰা বাছনি কৰি ‘পুষ্পাদেৱী জালান সোঁৱৰণি বঁটা’ প্ৰদান কৰা হয়৷
‘বাৰ্তাপখিলী’ৰ ৰূপালী জয়ন্তী বৰ্ষ অতিক্ৰমি ষষ্ঠবিংশ বৰ্ষত পদাৰ্পণ আৰু সৰবৰহী মহিলা পুষ্পাদেৱী জালানৰ নৱম মৃত্যু বাৰ্ষিকী উপলক্ষে ২০২০ বৰ্ষৰ বঁটাৰ বাবে নিৰ্বাচকমণ্ডলীয়ে ‘ৰহা মহাবিদ্যালয়’ৰ অসমীয়া বিভাগৰ সহযোগী অধ্যাপিকা তথা বিভাগীয় মুৰব্বী অধ্যাপিকা ড॰ ৰাজশ্ৰী বৰাক নিৰ্বাচিত কৰি আজি আনুষ্ঠানিকভাৱে প্ৰদান কৰা হয়।
মাহেকীয়া আলোচনী ‘বাৰ্তাপখিলী’ৰ উদ্যোগত আৰু সৰবৰহী মহিলা পুষ্পাদেৱী জালান পৰিয়ালবৰ্গৰ সহযোগত অনুষ্ঠিত বঁটা প্ৰদান অনুষ্ঠানত মুখ্য অতিথি হিচাপে অংশগ্ৰহণ কৰে অৱসৰপ্ৰাপ্ত উপাচাৰ্য, সাহিত্যিক, আবৃত্তিকাৰ তথা শিক্ষাবিদ ড॰ অমৰজ্যোতি চৌধুৰী আৰু অৱসৰপ্ৰাপ্ত আয়ুক্ত সচিব, সাহিত্যিক থানেশ্বৰ মালাকাৰ উপস্থিত থাকে।
আকাশবাণী গুৱাহাটী কেন্দ্ৰৰ বিষয়া ইন্দ্ৰজিৎ দাসে আঁতধৰা সভাত সভাৰ উদ্দেশ্য ব্যাখ্যা কৰে ‘বাৰ্তাপখিলী’ৰ সম্পাদক ব্ৰজেন্দ্ৰনাথ ডেকাই। তেওঁ বক্তব্যৰ মাজতে ‘বাৰ্তাপখিলী’ আলোচনীৰ জন্মলগ্নৰ তিতা-মিঠা অভিজ্ঞতাৰ বিষয়ে উল্লেখ কৰাৰ লগতে মহীয়সী নাৰী, সৰবৰহী মহিলা পুষ্পাদেৱী জালান পৰিয়ালক ধন্যবাদ জনায়।
সভাত মুখ্য অতিথি হিচাপে উপস্থিত থাকি বক্তব্য আগবঢ়াই থানেশ্বৰ মালাকাৰে। তেওঁ কয় যে পিতৃ-মাতৃৰ প্ৰতি শ্ৰদ্ধা জনাব নজনা লোকে ধৰ্মৰ মূল্যই বুজি নাপায়। তাত্ত্বিক কথাৰে পিতৃ-মাতৃক শ্ৰদ্ধা জনোৱা কাৰ্যৰ মহত্ব উপলব্ধিহে কৰিব পাৰি বুলি তাৎপৰ্যপূৰ্ণ মন্তব্য আগবঢ়ায়। মহিলাৰ সোঁৱৰণত মহিলাক সন্মান জনোৱা কাৰ্য সঁচাকৈয়ে আদৰণীয় বুলি বক্তব্যৰ মাজত উল্লেখ্য কৰে।
ডঃ অমৰজ্যোতি চৌধুৰীয়ে মুখ্য অতিথি হিচাপে অংশগ্ৰহণ কৰি কয় যে নৱ-প্ৰজন্মই এনে সভাত অংশগ্ৰহণ কৰা দৰকাৰ। ভাষা-সাহিত্য-সংস্কৃতিৰ চৰ্চা ক্ষেত্ৰত তেওঁলোকে ভৱিষ্যতে আগভাগ ল’ব।বাৰ্তাপখিলীত নৱ-প্ৰজন্মৰ লেখক-লেখিকা লেখা-মেলাক গুৰুত্ব দিয়া হয়। নৱ-প্ৰজন্মৰ লেখা, তেওঁৰ চিন্তা-চৰ্চাক প্ৰাধান্য দিয়া দেখি আহিছো বুলিও গুৰুত্বপূৰ্ণ মন্তব্য আগবঢ়ায়।
‘বাৰ্তাপখিলী’য়ে উদ্যোগ লোৱা আৰু সৰবৰহী মহিলা পুষ্পাদেৱী জালানৰ স্মৃতিত পৰিয়ালে সহযোগ কৰা এই বঁটা প্ৰদান অনুষ্ঠানৰ জৰিয়তে অসমীয়া ভাষা-সাহিত্যৰ সেৱা কৰিবলৈ আগবাঢ়ি অহাৰ বাবে বাৰ্তাপখিলী আৰু গোপাল জালান পৰিয়ালক আনুষ্ঠানিকভাৱে শলাগ জনাই ডঃ অমৰজ্যোতি চৌধুৰীয়ে।
সভাত বঁটাপ্ৰাপক ডঃ ৰূপশ্ৰী বৰাই ভাষণ প্ৰসংগত কয় যে গভীৰ অন্তৰাত্মাৰ জৰিয়তে লেখাখিনি লিখিবলৈ চেষ্টা কৰোঁ। এই সন্মান প্ৰদানে মোৰ দায়িত্ব বঢ়ালে বুলিও মন্তব্য কৰে।
সভাতে আলোচনীখনিক বিশেষভাৱে সহযোগ আগবঢ়াই অহা দীপজ্যোতি বৰুৱা আৰু তপন দত্তক বাৰ্তাপখিলীৰ তৰফৰ পৰা ফুলাম গামোচাৰে আদৰণি জনোৱা হয়। উল্লেখ্য যে ‘পুষ্পাদেৱী জালান সোঁৱৰণি সাহিত্য বঁটা’ৰ লগত ২১,০০০ (একৈশ হাজাৰ) টকা, স্মাৰক, গ্ৰন্থৰ টোপোলা আৰু মানপত্ৰ প্ৰদান কৰা হয়৷
