গুৱাহাটীৰ এজন ব্যৱসায়ী যুৱকক কৌশলেৰে বাক্সা জিলাৰ তামুলপুৰলৈ মাতি আনি অপহৰণ কৰি নি ধন দাবীৰে ধন লুট কৰি আৰু তিনিগৰাকী যুৱক ৰঙাঘৰৰ আলহী হব লগা হোৱা ঘটনাই সমগ্ৰ তামুলপুৰ মহকুমাত চাঞ্চল্যৰ সৃষ্টি কৰিছে।
তামুলপুৰ আৰক্ষী থানাৰ ভাৰপ্ৰাপ্ত বিষয়া অসীম বৰাই জানিবলৈ দিয়া অনুসৰি নলবাৰী আৰক্ষী থানাৰ অন্তৰ্গত জাপাৰকুছি গাঁৱৰ অমিত শৰ্মা নামৰ যুৱক এজনে ৩ নৱেম্বৰত গুৱাহাটীৰ ব্যৱসায়ী দিগন্ত বুজৰবৰুৱাক তামুলপুৰ বজাৰত চিচি কেমেৰা লগাব লাগে বুলি তামুলপুৰলৈ মাতি আনে।
তামুলপুৰ আহি পোৱাৰ পিছত অমিতে আন কেইজনমান যুৱক ক্ৰমে নয়ন ডেকা, ভগৱান দাস, ৰাজনী বড়ো আৰু মণ্টু দাসৰ লগত লগ লাগি কৌশলেৰে দিগন্তক তামুলপুৰ আৰক্ষী থানাৰ অন্তৰ্গত হাঁহকাটা-বালাবাৰীৰ ওচৰত পাগলাদিয়া নদীৰ পাৰত জনশূন্য মথাউৰি এটালৈ লৈ যায় আৰু দহ লাখ টকা দাবী কৰি মৃত্যুৰ ভাবুকি দিয়ে।
পিছত যুৱক কেইজনে নেট বেংকিংৰ জৰিয়তে দিগন্তৰ বেংক একাউন্টত থকা বিশ হাজাৰ টকা অমিত শৰ্মাৰ একাউণ্টলৈ ট্ৰেন্সফাৰ কৰি নিয়ে আৰু কেইখনমান উকা দলিলত দিগন্তৰ চহী কৰাই লৈ পিছত দিগন্তক মুকলি কৰি দিয়ে।
যোৱা ৫ নৱেম্বৰত দিগন্ত বুজৰবৰুৱাই ঘটনা সন্দৰ্ভত তামুলপুৰ আৰক্ষী থানাত এখন এজাহাৰ দাখিল কৰে। দিগন্তৰ এজাহাৰৰ ভিত্তিত তামুলপুৰ আৰক্ষী থানাৰ ভাৰপ্ৰাপ্ত বিষয়া মনোজ দাসৰ নেতৃত্বত যোৱা এটা আৰক্ষীৰ দলে ৫ নৱেম্বৰৰ নিশা নলবাৰীৰ জাপাৰকুছিত উপস্থিত হৈ অমিত শৰ্মাৰ ঘৰত তালাচী চলায় যদিও অমিতক কৰায়ত্ত কৰিবলৈ সক্ষম নহ’ল।
নিশাই আৰক্ষীয়ে নলবাৰী চহৰৰ পৰা ভগবান দাসক বিচাৰি অভিযান চলাই আটক কৰিবলৈ সক্ষম হয়। পিছত আৰক্ষীয়ে তদন্তৰ জৰিয়তে তামুলপুৰৰ বৰখোপা গাঁৱৰ পৰা নয়ন ডেকা আৰু মাদাৰবাৰী গাঁৱৰ পৰা ৰজনী বড়োক আটক কৰে।
আৰক্ষীয়ে ঘটনাত ব্যৱহৃত এ এছ -১৪- এইচ- ৯২৯৯ নম্বৰৰ এখন গ্ৰেণ্ড আই ১০ গাড়ী আৰু এ এছ -০১-এ কিউ- ৩৫২০ মটৰ চাইকেল জব্দ কৰে।
শুকুৰবাৰে আৰক্ষীয়ে নয়ন ডেকা, ভগবান দাস আৰু ৰাজনী বড়োক বাক্সা জিলা সদৰ মুছলপুৰৰ ন্যায়িক দণ্ডাধীশৰ আদালতত হাজিৰ কৰোৱাই পুনৰ তিনি দিনৰ বাবে আৰক্ষীৰ জিম্মালৈ আনে।
পলাতক অৱস্থাত থকা অমিত শৰ্মা আৰু মণ্টু দাসক বিচাৰি আৰক্ষীয়ে অভিযান অব্যাহত ৰাখিছে। ঘটনা সন্দৰ্ভত যুৱক কেইজনৰ বিৰুদ্ধে তামুলপুৰ আৰক্ষী থামাত গোচৰ নং ৫৬৬/২০ ত আৰু ভাৰতীয় দণ্ডবিধি আইনৰ অধীনৰ ৪২০/৩৬৫/৩৮৭/ ৩৯৫/৪৬৮ ধাৰাত গোচৰ ৰুজু কৰি তদন্ত অব্যাহত ৰাখিছে।
