আইন শৃংখলা ৰক্ষাত ‘শ্বোলে’ৰ সংলাপ! ভিডিঅ’ ভাইৰেল হোৱাৰ পাছতে শ্ব’কজৰ সন্মুখীন আৰক্ষী বিষয়া

চলচ্চিত্ৰৰ ষ্টাইলত সংলাপ আওৰাই বিপদত পৰিছে মধ্য প্ৰদেশৰ এগৰাকী আৰক্ষী বিষয়া। চিনেমাৰ প্ৰতি থকা অত্যধিক প্ৰেমৰ বাবে শ্ব’কজৰ সন্মুখীন হোৱা আৰক্ষী বিষয়াগৰাকীৰ চাকৰিক লৈ চলিছে এতিয়া টনাটনি।

মধ্য প্ৰদেশৰ কল্যানপুৰ থানাৰ ভাৰপ্ৰাপ্ত বিষয়া কে এল ডাংগীয়ে সহযোগীসকলক লৈ কৰ’না পৰিস্থিতি পৰ্যবেক্ষণৰ বাবে বিভিন্ন অঞ্চললৈ যায়।

বিভিন্ন স্থানত তেওঁ সতৰ্কবাৰ্তা দিয়ে যদিও তেওঁৰ এই বাৰ্তা দিয়াৰ পদ্ধতি আছিল কিছু সুকীয়া। সম্পূৰ্ণ চলচ্চিত্ৰৰ ভংগীৰে কে এল ডাংগীয়ে সত্তৰৰ দশকৰ ব্লক ব্লাষ্টাৰ ‘শ্বোলে’ৰ সংলাপ ব্যৱহাৰ কৰা এটা ভিডিঅ’ ছচিয়েল মিডিয়াত ভাইৰেল হৈ পৰে।

ভিডিঅ’টোত দেখা গৈছে যে জয় নাইবা বীৰুৰ সলনি ভিলেইন গব্বৰৰ ভূমিকাত অৱতীৰ্ণ হৈছিল আৰক্ষী বিষয়াগৰাকীয়ে। জীপত লৈ যোৱা মাইকত তেওঁ কোৱা শুনা যায়,’’কল্যাণপুৰৰ পৰা ৫০-৫০ কিলোমিটাৰ পৰ্যন্ত যেতিয়া কোনো শিশুৱে কান্দে, মাকে তাক কয়, বেটা শুই যোৱা, ডাংগী আহি যাব।‘’

অঞ্চলটোত পৰিস্থিতি নিয়ন্ত্ৰণৰ বাবে সামান্য ৰসিকতা কৰিয়েই বিষয়াগৰাকীয়েই হয়তো এনে সংলাপ কৈছিল। কিন্তু ছচিয়েল মিডিয়াত সেই ভিডিঅ’ ভাইৰেল হৈ পৰাত শীৰ্ষ আৰক্ষী বিষয়াৰ দৃষ্টিত পৰে। ফলত শ্ব’কজৰ সন্মুখীন হয় আৰক্ষী বিষয়া ডাংগী।

Show-cause notice issued to KL Dangi, Incharge of Kalyanpura Police station in Jhabua who was spotted saying an altered version of ''Sholay'' from a megaphone mounted on his police jeep @ndtv @ndtvindia pic.twitter.com/wVnQsyIW30

— Anurag Dwary (@Anurag_Dwary) November 16, 2020

এই সন্দৰ্ভত স্থানীয় অতিৰিক্ত আৰক্ষী অধীক্ষকগৰাকীয়ে কয় যে ইতিমধ্যে আৰক্ষী বিষয়াগৰাকীক শ্ব’কজ দিয়া হৈছে। বিষয়টোৰ সম্পূৰ্ণ তদন্ত কৰি চোৱা হ’ব। চিনেমাৰ প্ৰতি কাৰোবাৰ অনুৰাগ থাকিব পাৰে, কিন্তু কৰ্তব্যৰত আৰক্ষী বিষয়াৰ পৰা এনে ব্যৱহাৰ আশা কৰা নাযায়।

নিজৰ পদ মৰ্যাদা অক্ষুণ্ণ ৰখাটো জৰুৰী বুলি জ্ঞান কৰা শীৰ্ষ বিষয়াৰ ৰোষত পৰি আৰক্ষী বিষয়া ডংগীৰ চাকৰিক লৈয়ো এতিয়া শংকাৰ সৃষ্টি হৈছে।