শৰীৰত আঘাত লৈও অষ্ট্ৰেলিয়াৰ ছিডনী টেষ্টত এক বিস্ফোৰক ইনিংছ খেলিলে ঋষভ পন্টে। মাত্ৰ ৩ৰাণৰ বাবে শতৰাণৰ পৰা বঞ্চিত হয় পন্ট।
কিন্তু শতৰাণৰ পৰা বঞ্চিত হ’লেও অষ্ট্ৰেলিয়াৰ মাটিত অনন্য অভিলেখ গঢ়িলে এইগৰাকী তৰুণ ভাৰতীয় বেটছমেনে।
উইকেটকীপাৰ বেটছমেন হিচাপে অষ্ট্ৰেলিয়াত টেষ্টত এছিয়ান ক্ৰিকেটাৰসকলৰ ভিতৰত সৰ্বাধিক ৰাণৰ গৰাকী হ’ল পন্ট। এইক্ষেত্ৰত তেওঁ চৈয়দ কিৰমানিৰ অভিলেখ ভংগ কৰে। তাকো প্ৰায় আধা সংখ্যক টেষ্ট মেচ খেলি।
সোমবাৰে ছিডনী টেষ্টৰ পঞ্চম তথা অন্তিম দিনটোত মেচ ৰক্ষা কৰাৰ যুঁজত প্ৰথমতে আঘাত লাগে ভাৰতৰ। হনুমা বিহাৰীৰ পৰিৱৰ্তে পাঁচ নম্বৰ স্থানত স্থান বেটিং কৰিবলৈ আহে ঋষভ পন্ট।
চাপৰ মাজতো ৰক্ষণাত্মক খেলৰ পৰিৱৰ্তে আক্ৰমণা নীতি গ্ৰহণ কৰে পন্টে। ইয়াৰ ফলত দিশহাৰা হৈ পৰে অষ্ট্ৰেলিয়া। শৰীৰত আঘাত লৈও অষ্ট্ৰেলিয়াৰ বলাৰসকলক ৰেহাই নিদিলে পন্টে।
দুৰ্ভাগ্যজনকভাৱে ব্যক্তিগত ৯৭ৰাণত নাথন লিয়নৰ বলত বৃহৎ শ্বট খেলিবলৈ গৈ আউট হয় পন্ট। কিন্তু ইতিমধ্যে অষ্ট্ৰেলিয়াৰ মাটিত অভিলেখ গঢ়ে ঋষভে।
এছিয়ান উইকেটকীপাৰ বেটছমেন হিচাপে অষ্ট্ৰেলিয়াত টেষ্ট মেচত সৰ্বাধিক ৰাণৰ হিচাপত পন্টে চৈয়দ কিৰমানিৰ অভিলেখ ভংগ কৰে।
১৯৭৭চনৰ পৰা ১৯৮৬চনৰ ভিতৰত অষ্ট্ৰেলিয়াত ১১খন টেষ্ট মেচৰ ১৭টা ইনিংছত কিৰমানিয়ে ৪৭১ ৰাণ কৰিছিল। ইয়াত তেওঁৰ সৰ্বোচ্চ ৰাণ আছিল ৫৫ আৰু ৰাণৰ গড় আছিল ২৯.৪৩।
কিৰমানিৰ এই অভিলেখ ভংগ কৰিবলৈ ঋষভে মাত্ৰ ছয়খন টেষ্টৰ ১০টা ইনিংছ খেলিছে। ছিডনীৰ তৃতীয় টেষ্টলৈকে পন্টে ৫১২ৰাণ কৰিছে।
