উচ্চতম ন্যায়ালয়ে মঙলবাৰে বিতৰ্কিত কৃষি আইন ৰূপায়নত স্থগিতাদেশ প্ৰদান কৰাৰ লগতে এই বিষয়টো সমাধানৰ বাবে এখন চাৰিজনীয়া উচ্চস্তৰীয় সমিতি গঠন কৰি দিয়ে।
সমিতিৰ প্ৰথমখন বৈঠক ১০ দিনৰ ভিতৰত অনুষ্ঠিত হ’ব আৰু ২ মাহৰ ভিতৰত সমিতিয়ে ইয়াৰ প্ৰতিবেদন দাখিল কৰিব।
অৱশ্যে প্রতিবাদকাৰী কৃষক সংগঠনবোৰ এই সমিতিক লৈ মুঠেও সন্তুষ্ট নহয় আৰু সমিতিৰ সৈতে আলোচনাত অংশ নলয় বুলিও স্পষ্ট কৰি দিছে।
আন্দোলনকাৰী কৃষক সংগঠন সমূহে কিয় এই সমিতিক লৈ সন্তুষ্ট নহয় আৰু সমিতিখন গঠন কৰি দিয়া বিশেষজ্ঞ চাৰিজনৰ বিষয়ে জানো আহক
ভুপিন্দৰ সিং মান
ৰাজ্যসভাৰ প্ৰাক্তন সাংসদ আৰু ভাৰতীয় কৃষক য়ুনিয়নৰ সৈতে জড়িত ভুপিন্দৰ সিং মান এজন কৃষি বিশেষজ্ঞ হোৱাৰ লগতে অখিল ভাৰতীয় কিষাণ সমন্বয় সমিতিৰ সভাপতি।
তদুপৰি ১৯৬৬ চনত গঠন হোৱা ফাৰ্মাৰ্ছ ফ্ৰেণ্ডছ এছ’চিয়েশ্যন এজন প্ৰতিষ্ঠাপক সদস্য আছিল। ইয়াৰ পিছত এই সংগঠনটো ‘পঞ্জাৱ খেতি-বাৰী য়ুনিয়ন’ বুলি জনা যায়।
ৰাষ্ট্ৰীয় পৰ্য্যায়ত সংগঠনটো কেন্দ্ৰীয় কিষাণ য়ুনিয়ন হৈ পৰিছিল আৰু এই সংগঠনটোৱে আন আন কৃষি সংগঠনৰ লগত মিলি কিষাণ সমন্বয় সমিতি গঠন কৰে।
উল্লেখ্য যে যোৱা ১৪ ডিচেম্বৰত অখিল ভাৰতীয় কিষাণ সমন্বয় সমিতিৰ অধীনত কৃষক সংগঠনবোৰে কেন্দ্ৰীয় কৃষি মন্ত্ৰী নৰেন্দ্ৰ সিং টোমৰক সাক্ষাৎ কৰি বিতৰ্কিত আইন কেইখনক সমৰ্থন জনাইছিল।
অনিল ঘনৱট
অনিল ঘনৱট মহাৰাষ্ট্ৰৰ মুখ্য কৃষক সংগঠন শ্বেটকাৰী সংগঠনৰ সভাপতি। শ্বেটকাৰী সংগঠনটোৱে কেন্দ্ৰীয় চৰকাৰৰ কৃষি আইন তিনিখনক সমৰ্থন কৰি আছে।
এই সংগঠনটোৱে কেন্দ্ৰীয় কৃষি মন্ত্ৰী নৰেন্দ্ৰ সিং টোমৰক সাক্ষাৎ কৰি আইন কেইখনৰ প্ৰতি সমৰ্থন আগবঢ়াই থৈছে।
মহাৰাষ্ট্ৰৰ এই সংগঠনটো বিখ্যাত কৃষক নেতা শৰদ যোশীৰ দ্বাৰা গঠন কৰা হৈছিল।
অশোক গুলাটি
কৃষি অৰ্থনীতিবিদ অশোক গুলাটিক ২০১৫ চনত পদ্মশ্ৰী প্ৰদান কৰা হৈছিল। খাদ্য যোগান আৰু মূল্য নিৰ্ধাৰণ নীতিৰ বাবে ভাৰত চৰকাৰক পৰামৰ্শ দিয়া উপদেষ্টা সমিতি কমিশ্যন ফৰ এগ্ৰিকালচাৰেল কাষ্টম এণ্ড প্ৰাইচেজৰ অধ্যক্ষ আছিল গুলাটি।
গুলাটিয়ে কৃষি সম্পৰ্কীয় বিভিন্ন বিষয় যেনে খাদ্য সুৰক্ষা, কৃষি-বাণিজ্য, শৃংখল প্ৰণালী, শস্য বীমা, ৰাজসাহায্য, স্থিৰতা আৰু দৰিদ্ৰতা নিৰ্মূল আদিৰ ওপৰত গৱেষণা কৰিছে।
অশোক গুলাটিক মোদী চৰকাৰৰ নতুন কৃষি আইন কেইখনৰ সমৰ্থক বুলি সৰ্বজন বিদিত। কিয়নো তেওঁ কৈছিল যে যদিহে চৰকাৰে চাপত আইন কেইখন প্ৰত্যাহাৰ কৰে, তেন্তে কৃষকসকলে লোকচানৰ সন্মুখীন হ’ব।
ড° প্ৰমোদ কুমাৰ যোশী
ড° প্ৰমোদ কুমাৰ যোশীও কৃষি খণ্ডৰ লগত জৰিত এজন জনপ্ৰিয় লোক। তেওঁ হায়দৰাবাদস্থিত নেশ্যনেল একাডেমি অফ এগ্ৰিকালচাৰেল ৰিচাৰ্ছ মেনেজমেণ্ট আৰু নেশ্যনেল চেণ্টাৰ ফৰ এগ্ৰিকালচাৰেল ইকনমিক্স এণ্ড পলিচি মেকাৰ্ছ, নতুন দিল্লীৰ অধ্যক্ষ আছিল।
উল্লেখ্য যে যোশীয়েও কষি আইন কেইখনৰ সপক্ষে নিজৰ মতামত ইতিমধ্যে দি থৈছে।
কষি আইনৰ বিৰুদ্ধে দীৰ্ঘদিন ধৰি প্ৰতিবাদ সাব্যস্ত কৰি থকা কৃষক সংগঠনৰ নেতাসকলে ওপৰোক্ত কাৰণসমূহৰ বাবে সৰ্বোচ্চ ন্যায়ালয়ে গঠন কৰি দিয়া এই সমিতিখনক লৈ মুঠেও সন্তুষ্ট নহয়।
সমিতিৰ চাৰিওজন সদস্য চৰকাৰী লোক বুলি অভিযোগ কৰি কৃষক নেতা ৰাকেশ টিকেট আৰু দৰ্শনপাল সিঙে স্পষ্টকৈ উল্লেখ কৰে যে আইন কেইখন বাতিল নকৰালৈকে আন্দোলন চলি থাকিব।
