এক জঘন্য ঘটনাৰ কথা পোহৰলৈ আহিছে। এগৰাকী ১৩ বচৰীয়া কিশোৰীক তিনিবাৰকৈ অপহৰণ কৰি নি মুঠ ৯ জন লোকে গণধৰ্ষণ কৰাৰ অভিযোগ উত্থাপন হৈছে।
এই জঘন্য ঘটনাটো সংঘটিত হৈছে মধ্যপ্ৰদেশত।
মধ্যপ্ৰদেশ আৰক্ষীৰ সূত্ৰই প্ৰকাশ কৰা ঘটনাৰ বিৱৰণীৰ মতে, প্ৰথমে যোৱা ৪ জানুৱাৰীত কিশোৰীগৰাকীক পৰিচিত ৬ লোকে অপহৰণ কৰি নি দুদিন ধৰি উপৰ্যুপৰি গণধৰ্ষণ কৰে।
এই গণধৰ্ষণ কাণ্ডৰ কথা গোপনে ৰাখিবলৈ ভাবুকি প্ৰদান কৰি দুদিনৰ পিছত কিশোৰীগৰাকীক দলটোৱে মুকলি কৰি দিয়ে।
ইয়াৰ পিছতে উক্ত দলটোৰ তিনিজনে যোৱা ১১ জানুৱাৰীত পুনৰ কিশোৰীগৰাকীক অপহৰণ কৰি প্ৰথমে হাবিৰ মাজত গণধৰ্ষণ কৰি পিছত এখন দোকানত আৱদ্ধ কৰি ৰাখি উপৰ্যুপৰি গণধৰ্ষণ কৰে।
দলটোৱে এৰি দিয়াৰ পিছতে কিশোৰীগৰাকী ৰাস্তাৰ দুই ট্ৰাক চালকৰ হাতত পৰে। অভিযোগ মতে উক্ত দুই চালকেও কিশোৰীগৰাকীক উপৰ্যুপৰি ধৰ্ষণ কৰে।
দুই ট্ৰাক চালকৰ পৰা পলাই আহিবলৈ সক্ষম হোৱা কিশোৰীগৰাকী যোৱা শুকুৰবাৰে নিজ গৃহত উপস্থিত হয়।
নিজ গৃহত উপস্থিত হোৱাৰ পিছতে কিশোৰীগৰাকীয়ে পৰিয়ালৰ লোকৰ আগত সমস্ত ঘটনা বিৱৰী কয়।
ইয়াৰ পিছতে পৰিয়ালৰ লোকে আৰক্ষী থানাত ঘটনাৰ সন্দৰ্ভত এজাহাৰ দাখিল কৰে।
উক্ত এজাহাৰৰ ভিত্তিত আৰক্ষীয়ে যৌন নিৰ্যাতন, শিশু সুৰক্ষা আইন(পস্কো)ৰ অধীনত গোচৰ ৰুজু কৰি ৬ জন অভিযুক্তক গ্ৰেপ্তাৰ কৰিছে।
উল্লেখ্য যে, শিৱৰাজ চৌৱান শাসিত মধ্যপ্ৰদেশত সপ্তাহজোৰা ‘সন্মান’ প্ৰকল্পৰ অভিযান চলি থকাৰ সময়তে যোৱা ৬ টা দিনত ৪ টাকৈ গণধৰ্ষণৰ ঘটনা সংঘটিত হৈছে।
