সন্মুখত পাঁচ খন ৰাজ্যৰ বিধানসভা নিৰ্বাচন।
এনে সময়তো দেশৰ এটা প্ৰাচীন ৰাজনৈতিক দল কংগ্ৰেছে আজিকোপতি নিৰ্বাচন কৰবি পৰা নাই এজন স্থায়ী সভাপতি।
পৰিয়াল কেন্দ্ৰিক ৰাজনীতিৰে পৰিচালিত কংগ্ৰেছত বহু কেইগৰাকী জ্যেষ্ঠ নেতাই স্থায়ী সভাপতি নিৰ্বাচন কৰিবলৈ চিঠি লিখিও বিমুখ হ’বলগীয়া হৈছে।
এনে সময়তে আজি অনষ্ঠিত কংগ্ৰেছৰ কাৰ্যকৰী সমিতিৰ বৈঠকত এই সিদ্ধান্ত লোৱা হয় যে ২০২১ চনৰ জুন মাহত দলটোৱে এগৰাকী স্থায়ী সভাপতি নিৰ্বাচন কৰিব।
কংগ্ৰেছৰ জ্যেষ্ঠ নেতা কেচি বেনুগোপালে এই সন্দৰ্ভত মন্তব্য কৰি কয় যে চলিত বৰ্ষৰ জুন মাহত দলটোৰ এজন সভাপতি নিৰ্বাচন কৰাৰ বাবে আজি দলৰ শীৰ্ষ নেতৃত্বই সিদ্ধান্ত গ্ৰহণ কৰে।
পাঁচ ৰাজ্যৰ বিধানসভা নিৰ্বাচন অন্ত পৰাৰ পিছতে কংগ্ৰেছে স্থায়ী সভাপতি নিৰ্বাচন কৰিব বুলি তেওঁ কয়। সভাত আনন্দ শৰ্মা,
মুকুল ৱাছনিক,গুলাম নবী আজাদ, পি চিদাম্বৰম আদি শীৰ্ষ নেতাসকল উপস্থিত থাকে।
উল্লেখ্য বিগত বৰ্ষৰ আগষ্ট মাহত নেতৃত্বৰ পৰিৱৰ্তন বিচাৰি পত্ৰ লিখা নেতাসকলক বেকফুটলৈ ঠেলি দি প্ৰত্যাশিতভাৱেই অন্তৱৰ্তীকালী সভাপতিৰ দায়িত্বত ছোনিয়া গান্ধীকে অধিষ্ঠিত কৰা হৈছিল।।
এই কথাত ক্ষুব্ধ নেতাসকলে গোলাম নবী আজাদৰ ঘৰত মিলিত হৈছিল এক বৈঠকত।
বিগত বৰ্ষৰ ২০ আগষ্টত কংগ্ৰেছ ৱৰ্কিং কমিটিৰ বৈঠকত সিদ্ধান্ত লোৱা হয় যে দলৰ অন্তৱৰ্তী সভাপতি হিচাপে ছোনিয়া গান্ধীয়েই কাৰ্যভাৰ চলাই নিব।
কিন্তু তেওঁ নতুন এগৰাকী সভাপতি নিৰ্বাচনৰ প্ৰক্ৰিয়া আৰম্ভ কৰিবৰ বাবে দ্ৰুত ব্যৱস্থা গ্ৰহণ কৰিব।
ছোনিয়া গান্ধীয়ে কৈছিল যে তেওঁ আৰু এই দায়িত্ব পালন কৰিব নিবিচাৰে। এই দায়িত্ব যাতে আন কোনোৱে গ্ৰহণ কৰে।
উল্লেখ্য যে নেতৃত্বৰ পৰিৱৰ্তন তথা দলৰ সাংগঠনিক সাল-সলনি বিচাৰি ২৩গৰাকী জ্যেষ্ঠ কংগ্ৰেছী নেতাই এখন পত্ৰ লিখিছিল।
ইয়াৰ পূৰ্বে এই পত্ৰখনক লৈ কংগ্ৰেছী নেতাসকলৰ মাজত অভিযোগ-প্ৰত্যাভিযোগৰ টুইটাৰত এখন সৰু যুঁজো চলে।
