দেশৰ ৰাজধানী ক’ত বুলি প্ৰশ্ন কৰিলে উত্তৰ এটাই পোৱা যাব— নতুন দিল্লী।
কিন্তু দিল্লীতেই কেৱল ৰাজধানী স্থাপন কৰাৰ সলনি দেশৰ চাৰিটা চুকত চাৰি খন ৰাজধানী স্থাপনৰ দাবী উত্থাপন কৰিলে এগৰাকী মুখ্যমন্ত্ৰীয়ে।
চাৰি খন ৰাজধানী স্থাপনৰ দাবী উত্থাপন কৰা মুখ্যমন্ত্ৰীগৰাকী হৈছে পশ্চিমবংগৰ মুখ্যমন্ত্ৰী মমতা বেনাৰ্জী।
আজি কলকাতাত নেতাজী সুভাষ চন্দ্ৰ বসুৰ ১২৫ সংখ্যক জন্ম জয়ন্তীৰ অনুষ্ঠানত ভাষণ দি মমতাই কয় যে কলকাতা এটা সময়ত ভাৰতৰ ৰাজধানী আছিল।
এতিয়া পুনৰ চহৰ খনক দেশৰ ৰাজধানী হিচাবে গ্ৰহণ কৰিব নোৱাৰাৰ কাৰণ কি বুলি তেওঁ প্ৰশ্ন কৰে।
সংসদৰ মজিয়াত দেশৰ চাৰিটা কোণত চাৰিখন ৰাজধানী স্থাপনৰ বাবে তৃণমূল কংগ্ৰেছৰ সাংসদসকলক মাত মাতিবলৈ মমতাই আহ্বান জনায়।
তেওঁ লগতে কয় যে তামিলনাডু, কেৰালা অথবা কৰ্ণাটকত দেশৰ আন এখন ৰাজধানী স্থাপন কৰিব পাৰে।
উত্তৰপ্ৰদেশ, পঞ্জাব বা ৰাজস্থানতো আন এখন ৰাজধানী স্থাপনৰ তেওঁ পোষকতা কৰে।
উত্তৰ পূৰ্বাঞ্চলতো তেওঁ আন এখন ৰাজধানী স্থাপনৰ দাবী জনায়।দেশত ৰাজধানীৰ সংখ্যা বৃদ্ধি হ’লেহে প্ৰশাসনিক সুবিধা হোৱাৰ দেশবাসী উপকৃত হ’ব বুলি তেওঁ মন্তব্য কৰে।
