গণৰাজ্য দিৱসৰ দিনা দিল্লীত “কৃষকৰ পেৰেডত থাকি ট্ৰেক্টৰ ৰেলিত ভাগ লোৱা অসমৰ অন্যতম নেতা সোনেশ্বৰ নৰহক আটক কৰাৰ অভিযান আৰম্ভ কৰিছে গোলাঘাট আৰক্ষীয়ে।
কৃষিমন্ত্ৰী তথা বোকাখাত সমষ্টিৰ বিধায়ক অতুল বৰাৰ নিৰ্দেশতেই কৃষক নেতা সোনেশ্বৰ নৰহক কৰায়ত্ব কৰাৰ পৰিকল্পনা কৰা বুলি অভিযোগ উত্থাপন কৰিছে সমষ্টিটোৰ জীপাল কৃষক শ্ৰমিক সংঘই।
সাংবাদ মাধ্যমলৈ প্ৰেৰণ কৰা এক প্ৰেছ বিবৃতিত জীপাল কৃষক শ্ৰমিক সংঘৰ সম্পাদক প্ৰবীন পেগুৱে কয় যে” সোনেশ্বৰ নৰহ বোকাখাত সমষ্টিৰ আটাইতকৈ প্ৰভাৱশালী বিৰোধী শক্তি তথা জীপাল কৃষক শ্ৰমিক সংঘৰ মুল কৰ্ণধাৰ।
বিগত সময়ছোৱাত আন ৰাজনৈতিক শক্তিবোৰতকৈ বোকাখাত সমষ্টিত জীপাল কৃষক শ্ৰমিক সংঘ তথা সোনেশ্বৰ নৰহৰ পৰা পোৱা প্ৰত্যাহ্বান মন্ত্ৰী অতুল বৰাৰ ৰাজনৈতিক জীৱনত আটাইতকৈ গভীৰ।
আগন্তুক বিধানসভাৰ নিৰ্বাচনত বোকাখাতত অতুল বৰাৰ বিৰুদ্ধে শক্তিশালী প্ৰাৰ্থীৰূপে প্ৰণৱ দলেক প্ৰক্ষেপ কৰি জিকাই অনাৰ মাষ্টাৰ মাইণ্ড হ’ল সোনেশ্বৰ নৰহ।‘’
এনে পটভুমিত মন্ত্রী অতুল বৰাই অজুহাত পালেই নৰহক আৱদ্ধ কৰি ৰখাৰ পৰিকল্পনা কৰাৰ খবৰ সংগঠনটোৱে ২৬জানুৱাৰীতে লাভ কৰিছিল” বুলি বিবৃতিত উল্লেখ কৰিছে সম্পাদকগৰাকীয়ে।
ইফালে ২৬জানুৱাৰীত দিল্লীৰ কৃষক সমদলত অংশ লোৱা আৰু আৰক্ষীয়ে কৰায়ত্ব কৰা অসমৰ দুগৰাকী সদস্য জয়ন্ত গগৈ আৰু দীনেশ দাসক বিনাচৰ্তে মুক্তি দিয়াৰ লগতে সোনেশ্বৰ নৰহ আৰু আন সদস্যক কৰায়ত্ব কৰাৰ বাবে আৰক্ষীয়ে চলোৱা অভিযানক তীব্ৰ গৰিহনা দিছে জীপালৰ সম্পাদক প্ৰবীন পেগুৱে।
