ৰাজধানী চহৰ নতুন দিল্লীৰ ইজৰাইলৰ দূতাবাসৰ সমীপত কালি সন্ধিয়া সংঘটিত বোমা বিস্ফোৰণৰ ঘটনাৰ দায়িত্ব স্বীকাৰ কৰিছে জইছ-উল-হিন্দ নামৰ সন্ত্ৰাসবাদী সংগঠনটোৱে।
আজি সংগঠনটোৱে টেলিগ্ৰাম চাটৰ জৰিয়তে এই বিস্ফোৰণৰ দায়িত্ব স্বীকাৰ কৰাৰ তথ্য আৰক্ষীৰ হাতত আহি পৰিছে।
টেলিগ্ৰাম চাটত সন্ত্ৰাসবাদী সংগঠনটোৱে পুনৰ সংঘটিত কৰিবলগীয়া আন কেতবোৰ কূটাঘাতৰ তথ্যত সন্নিবিষ্ট আছে বুলি এক বিশেষ সূত্ৰই প্ৰকাশ কৰিছে।
সংগঠনটোৰ টেলিগ্ৰাম চাটত ভয়ংকৰ কূটাঘাতৰ আগজাননী পোৱাৰ পিছতে মুম্বাইকে ধৰি বহু চহৰৰ নিৰাপত্তা ব্যৱস্থা কটকটীয়া কৰি তোলা হৈছে ।
কালিৰ বিস্ফোৰণটোত এম’নিয়া নাইট্ৰেট ব্যৱহাৰ কৰা বুলি আৰক্ষীয়ে প্ৰকাশ কৰিছে।
উল্লেখ্য কালি সন্ধিয়া এক ভয়ংকৰ বোমা বিস্ফোৰণত কঁপি উঠিছিল দেশৰ ৰাজধানী চহৰ দিল্লী।
দিল্লীৰ বিজয় চ’কৰ প্ৰায় সমীপতে থকা ইজৰাইলৰ দূতাবাসৰ ওচৰতে আজি সন্ধিয়া ৫.০৫ বজাত সংঘটিত হৈছিল আইইডি বিস্ফোৰণটো।
বিস্ফোৰণৰ ফলত পাঁচ খন বাহন ক্ষতিগ্ৰস্ত হয় যদিও কোনো লোক হতাহত হোৱা নাছিল।
দিল্লী আৰক্ষীৰ শীৰ্ষ সূত্ৰই প্ৰকাশ কৰা মতে বোমাটো কম প্ৰাৱল্যৰ আছিল আৰু ইয়াক ফুটপাথৰ কাষতে স্থাপন কৰা হৈছিল।
বিস্ফোৰণৰ পিছতে সমগ্ৰ অঞ্চলটোত এনএছজি নিয়োগ কৰা হৈছে।
দিল্লী আৰক্ষীয়ে বিস্ফোৰণৰ ঘটনাটোৰ তদন্তত নামি পৰিছে যদিও আজি পুৱালৈকে কোনো ৰহস্য ভেদ কৰিবলৈ সক্ষম হোৱা নাছিল।
