শনিবাৰে সন্ধিয়া কাজিৰঙাৰ অগৰাতলি বনাঞ্চলত গঁড়ৰ আক্ৰমণত এজন বনকৰ্মী নিহত হয় ৷ বনকৰ্মী জনৰ নাম মহেশ্বৰ হাজৰিকা ৷
হাজৰিকাৰ ঘৰ কাজিৰঙাৰ বচাগাওঁত ৷ কাজিৰঙা ৰাষ্ট্ৰীয় উদ্যানৰ অগৰাতলি বনাঞ্চলৰ চিগা নামৰ বনশিৱিৰত কৰ্মৰত মহেশ্বৰ হাজৰিকা নামৰ বনকৰ্মীজনে সতীৰ্থ বনকৰ্মীৰ লগত নিশাৰ পহৰাৰ বাবে ওলাই গৈছিল ৷
নিশা খোজ কাঢ়ি পহৰা দি সমীপৰ নলনি নামৰ বন শিৱিৰত উপস্থিত হৈছিলগৈ৷
নলনি বন শিৱিৰতে নিশাৰ আহাৰ গ্ৰহণ কৰি নিজৰ বন শিৱিৰলৈ উভতি অহাৰ পথত গঁড়ে অতৰ্কিতে কৰা আক্ৰমণত মহেশ্বৰ হাজৰিকা গুৰুতৰভাৱে আহত হয়।
আহত বনকৰ্মীজনক ততাতৈয়াকৈ বোকাখাতৰ অসামৰিক চিকিৎসালয়লৈ আনে যদিও চিকিৎসালয়ত চিকিৎসকে তেওঁক মৃত বুলি ঘোষণা কৰে ৷
দীৰ্ঘ জীৱন কাজিৰঙাতে কাম কৰি যোৱা মহেশ্বৰ হাজৰিকাই বন্যপ্ৰাণীৰ অধিকাৰ সুৰক্ষাৰ স্বাৰ্থত কৰ্তব্যৰত অৱস্থাতে মৃত্যুক আকোৱালি লয় ৷
আজি পুৱা বোকাখাত আৰক্ষীয়ে মহেশ্বৰ হাজৰিকাৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰিছে ৷
