আৰক্ষী থানাতেই অনুষ্ঠিত হোৱা এখন ব্যতিক্ৰমী বিয়াৰ ঘটনা পোহৰলৈ আহিছে। মঙলবাৰে এহাল বাকদত্তাই আৰক্ষীৰ উপস্থিতিতে এজনে সিজনক বৰমালা পিন্ধাই সাত জনমলৈ এক হোৱাৰ কথা দিয়ে।
উত্তৰ প্ৰদেশৰ দুৰ্গাৱতীৰ ঘটনা এয়া। কৰ’নাৰ সংকটৰ মাজত লকডাউনৰ বাবে পৰিয়াললৈ অহা আৰ্থিক বিপৰ্যয়ৰ কাৰণে এই যুগলবন্দীয়ে থানাকেই বিবাহৰ উপযুক্ত স্থান হিচাপে নিৰ্বাচিত কৰে।
মঙলবাৰে কোনো বিবাহৰ লগ্ন নাছিল, নাছিল বৰযাত্ৰী বা পৰিয়ালবৰ্গ। বাকদত্তাৰ সৈতে আৰক্ষী থানাতেই বিয়া সম্পূৰ্ণ কৰিলে যুৱকে।
থানাখনৰ আৰক্ষীকৰ্মী, বিষয়াসকলৰ লগতে কেইগৰাকীমান লোক বিয়াখনত উপস্থিত থাকে। এগৰাকী সাংবাদিকে মন্ত্ৰোচ্চাৰণ কৰি বিয়াৰ ৰীতি সম্পূৰ্ণ কৰে।
কন্যাপক্ষৰ লোকে জানিবলৈ দিয়া মতে যোৱা এবছৰ ধৰি কৰ’নাৰ সংকটৰ বাবে ঘোষণা কৰা লকডাউনৰ ফলত দুয়োটা পৰিয়াললৈ আৰ্থিক সংকট নামি আহে। কিন্তু বিয়াখনতো পাতিব লাগে।
বিয়া বুলিলেই জৰুৰী খৰচৰ লগতে আন বহুতো খৰচৰ কথা আহে। সেই কাৰণেই ইয়াৰ পৰা পৰিত্ৰাণ পাবলৈ দুয়োপক্ষই বিয়াখন আইনক সাক্ষী কৰিয়েই সম্পূৰ্ণ কৰিবলৈ বিচাৰে।
এনেদৰেই দুৰ্গাৱতী থানাৰ আৰক্ষী বিষয়াসকলৰ উপস্থিতিতেই বিয়াখনৰ ৰীতি-নীতি সম্পূৰ্ণ কৰা হয়। বিয়াৰ ৰীতি-নীতি সম্পূৰ্ণ কৰাৰ পাছত উপস্থিত লোকসকলৰ মাজত মিঠাই বিতৰণ কৰা হয় আৰু সকলোৱে দৰা-কইনাক এক সুখী দাম্পত্য জীৱনৰ বাবে আশীৰ্বাদ দিয়ে।
