আগন্তুক বিধান সভা নিৰ্বাচনৰ আগমুহূৰ্তত ৮১ নং লাহৰীঘাট সমষ্টিত শাসক-বিৰোধীৰ লগতে প্ৰতিটো ৰাজনৈতিক দলেই বিশাল সভা, সমাবেশ পাতি যেন নিৰ্বাচনী ৰণশিঙাহে বজাইছে।
মঙলবাৰে সমষ্টিটোৰ তিনিচুকীয়াত এ আই ইউ ডি এফ দলে বিশাল সমাবেশ পাতি যোৱাৰ পাছত আজি আকৌ আঞ্চলিক দল অসম গণ পৰিষদে সমষ্টিটোৰ লাহৰীঘাট উন্নয়ন খণ্ডৰ খেল পথাৰত অনুষ্ঠিত কৰে জাতীয় ঐক্য সমাৰোহ।
সমাৰোহত মুখ্য অতিথিৰূপে উপস্থিত থাকে অসম চৰকাৰৰ কৃষি মন্ত্ৰী তথা অগপৰ সভাপতি অতুল বৰা আৰু জলসম্পদ মন্ত্ৰী তথা দলটোৰ কাৰ্যকৰী সভাপতি কেশৱ মহন্ত।
সমাৰোহত ভাষম প্ৰদান কৰি অগপৰ সভাপতি তথা মন্ত্ৰী অতুল বৰাই কয় যে অসম গণ পৰিষদ দল হৈছে অসমৰ ৰাইজৰ তেজেৰে গঠিত দল আৰু ই এটা ধৰ্ম নিৰপেক্ষ দল।
বিৰোধী দল কংগ্ৰেছ আৰু তদানীন্তন কংগ্ৰেছ চৰকাৰ কাৰ্যকালৰ প্ৰভাৱশালী মন্ত্ৰী তথা বৰ্তমানৰ লাহৰীঘাটৰ বিধায়ক নজৰুল ইছলামক তীব্ৰ সমালোচনা কৰি মন্ত্ৰী বৰাই কয় যে ইমান দিনে লাহৰীঘাট সমষ্টিত এখন চৰকাৰী কলেজ নাছিল।আমাৰ চৰকাৰৰ দিনত হোৱা বুলি কৈ কংগ্ৰেছৰ ইমান দিনৰ কাৰ্যকালত এখন চৰকাৰী কলেজ পাবলৈ সক্ষম হোৱা নাছিল বুলি মন্তব্য কৰে মন্ত্ৰী বৰাই।
মন্ত্ৰীগৰাকীয়ে নিজ বিভাগৰ ঢোপ পিটি কয় যে কৃষি উন্নয়নৰ বাবে ট্ৰেক্টৰ, পাৱাৰ টিলাৰ দিয়া হৈছে। কৃষি ক্ষেত্ৰখনত বিপ্লৱৰ সূচনা হৈছে।
গছত কঁঠাল ওঠত তেল নৌপাওঁতেই চেলবেল বুলি নতুন আঞ্চলিক দল দুটাকো কটাক্ষ কৰে অতুল বৰাই।
কংগ্ৰেছ আৰু এআইইউডি ফে মনে মনে কৰি থকা প্ৰেম এতিয়া মুকলিকৈ হৈছে। কংগ্ৰেছৰ বাবে আজমল ন কইনা। কিন্তু ন কইনাক কংগ্ৰেছে শিকাই বুজাই লব লাগিছিল। কাৰ আগত ক’ত কি কথা কব লাগে শিকাই লব লাগিছিল। তাকে নকৰাত আজমলে শংকৰদেৱৰ বিতৰ্কত সোমাব লগা হ’ল বুলি টিপ্পনি দিয়ে অতুল বৰাই।
একেদৰে মন্ত্ৰী কেশৱ মহন্তই কয় যে অসমৰ ৰাজনীতি, ভাৰত বৰ্ষৰ ৰাজনীতিত কংগ্ৰেছ এআইইউ ডিএফে যিমানেই বন্ধুত্ব নকৰক, অসমত পুনৰ এবাৰ অসম গণ পৰিষদ দল থকা এটা মিত্ৰ জোঁটৰ চৰকাৰ হ’ব।
আনহাতে যোৱা পাঁচ বছৰে তেওঁ লাহৰীঘাটৰ মথাউৰিয়ে মথাউৰিয়ে ঘূৰিছে। নৈপৰীয়া ৰাইজে বিপুল সহযোগ কৰিছে গৰখহনীয়া প্ৰতিৰোধৰ কামত। কংগ্ৰেছৰ দিনৰ কাজিয়া সংস্কৃতি নোহোৱা হৈছে। বিধায়ক নজৰুল বয়স্ক লোক বাবে নজৰুলক সন্মান কৰোঁ কিন্তু তেখেত ব্যৰ্থ হৈছে বুলিও মন্ত্ৰী মহন্তই কয় ।
সমাৰোহখনত মন্ত্ৰী দুগৰাকীৰ লগতে কেন্দ্ৰীয় সংখ্যালঘু পৰিষদৰ সভাপতি আবু বক্কৰ ছিদ্দিক, কেন্দ্ৰীয় মহিলা পৰিষদৰ উপ সভানেত্ৰী মামণি বৰা, মৰিগাঁও জিলা অগপৰ সভাপতি শান্তনু শৰ্মা, হোজাই জিলা অগপৰ সভাপতি ৰেজাউল কৰিম,লাহৰীঘাট সমষ্টিৰ মহিলা পৰিষদৰ সভানেত্ৰী শকুন্তলা বৰদলৈকে ধৰি জিলা পৰ্যায়ৰ কেইবা গৰাকী বিষয়ববীয়া উপস্থিত থাকে।
সমষ্টিটোৰ সাত সহস্ৰাধিক লোক উপস্থিত থকা সমাৰোহখনৰ আৰম্ভণিতে আদৰণি ভাষণ পাঠ কৰে লাহৰীঘাট বিধান পৰিষদৰ সভাপতি তথা আগন্তুক নিৰ্বাচনৰ সমষ্টিটোৰ প্ৰাৰ্থীত্ব প্ৰত্যাশী গুলজাৰ হুছেইনে।
উল্লেখযোগ্য যে সমাৰোহ খনত কণ্ঠশিল্পী ভৃগু কাশ্যপ আৰু ছাজন নায়কে গীত পৰিবেশন কৰে আৰু গীতৰ তালে তালে শিশু, মহিলা সকলোৱে নাচি বাগি উৎফুল্লিত হৈ পৰে।
