অসম ৰাজ্যিক চিৰিয়াখানা কৰ্তৃপক্ষই গোপনে দুটাকৈ ব্লেক পেন্থাৰ আম্বানীক গটোৱাৰ অভিযোগ উত্থাপিত হৈছে।
বাতৰি অনুসৰি যোৱা ১২ জানুৱাৰিত চিৰিয়াখানাৰ গড়ালত থকা দুটাকৈ আপুৰুগীয়া ব্লেক পেন্থাৰ চিৰিয়াখানাখনৰ ডি এফ অ’ তেজছ মৰিস্বামীয়ে চৰকাৰী নীতি উলংঘা কৰি কেইগৰাকীমান বিষয়া-কৰ্মচাৰীৰ সহযোগত মুকেশ আম্বানীৰ পুত্ৰ অনন্ত আম্বানীক গটাই দিছে।
জানিব পৰা মতে, ৰিলায়েন্স গ্রুপৰ ‘গ্ৰীন জুল’জিকেল’ পাৰ্কলৈ প্ৰেৰণ কৰা হৈছে ব্লেক পেন্থাৰ দুটা।
আনহাতে, এই ব্লেক পেন্থাৰ দুটা স্থানান্তৰ কৰাৰ বাবে ডি এফ অ’ তেজছ মৰিস্বামীকে ধৰি চিৰিয়াখানাখনৰ কেইগৰাকীমান বিষয়া-কৰ্মচাৰীয়ে আম্বানী পৰিয়ালৰ তৰফৰ পৰা উপঢৌকন লাভ কৰাৰো অভিযোগ উত্থাপন হৈছে।
ইপিনে,এনে অভিযোগ অস্বীকাৰ কৰি ডিএফঅ’ তেজছ মৰিস্বামীয়ে স্পষ্টীকৰণ দি কয় যে সম্পূৰ্ণ চৰকাৰী নিয়মেৰে আৰু কেন্দ্ৰীয় চিৰিয়াখানাৰ অনুমতি সাপেক্ষে এই দুটা ব্লেক পেন্থাৰ প্ৰেৰণ কৰা হৈছে।
তেওঁ লগতে জানিবলৈ দিয়ে যে ব্লেক পেন্থাৰৰ বিনিময়ত ইজৰাইলৰ পৰা গুৱাহাটী চিৰিয়াখানালৈ ৪টাকৈ জেব্ৰা আহিব।
অসমৰ চিৰিয়াখানাৰ পৰা আম্বানী পুত্ৰৰ ‘গ্ৰীন জুল’জিকেল’ পাৰ্কলৈ গোপনে আপুৰুগীয়া ব্লেক পেন্থাৰ প্ৰেৰণ কৰা বিষয়ত বিভিন্ন মহলে প্ৰতিক্ৰিয়াও প্ৰকাশ কৰিছে।
