কৰ’না ভাইৰাছৰ তথ্য দিব বিচৰা নাই চীনে। বিশ্ব স্বাস্থ্য সংস্থা(WHO)ৰ তদন্তকাৰী দলৰ সদস্য তথা সংক্ৰামক ৰোগ বিশেষজ্ঞ ডমিনিক ডয়াৰে এই দাবী কৰিছে।
তেওঁ দাবী কৰি কয় যে বেইজিঙে য়ুহান চহৰৰ কৰ’না মহামাৰীৰ আৰম্ভণিৰ সময়ৰ তথ্য দিয়া নাই।
২০১৯চনৰ ডিচেম্বৰত চীনৰ হুবেই প্ৰদেশৰ ৰাজধানী য়ুহান চহৰৰ পৰাই সমগ্ৰ বিশ্বতে কৰ’না ভাইৰাছ বিয়পি পৰিছিল।
প্ৰথমৰে পৰাই কৰ’না ভাইৰাছৰ উৎপত্তিক লৈ চলি থকা জল্পনা-কল্পনাৰ মাজতে য়ুহান চহৰকে ইয়াৰ উৎপত্তিস্থল হিচাপে সকলোৱে মানি লৈছে।
আমেৰিকাৰ প্ৰাক্তন ৰাষ্ট্ৰপতি ডোনাল্ড ট্ৰাম্পকে ধৰি বহুতেই বেইজিঙলৈ অভিযোগৰ আঙুলি টোৱাইছিল।
য়ুহানৰ মাংসৰ বজাৰৰ পৰাই সংক্ৰমণৰ আৰম্ভণি ঘটা বুলি বহুতে দাবী কৰাৰ বিপৰীতে আন বহুতে য়ুহানৰ লেবৰটেৰীত কৃত্ৰিমভাৱে এই ভাইৰাছ তৈয়াৰ কৰা বুলি দাবী কৰি আহিছে।
এই প্ৰশ্নসমূহৰ সঠিক তথ্যৰ বাবে তদন্ত চলাবলৈ বিশ্ব স্বাস্থ্য সংস্থাৰ এটা প্ৰতিনিধি দল। সম্প্ৰতি তেওঁলোকে দাবী কৰিছে যে লেবৰটেৰীত কৰ’না ভাইৰাছৰ সৃষ্টি হোৱা নাই। কিন্তু প্ৰতিনিধি দলৰ সদস্য ডমিনিক ডয়াৰৰ অভিযোগে গোটেই প্ৰক্ৰিয়াটোকে সন্দেহাধীন কৰি তুলিছে।
যোৱা জানুৱাৰিত কৰ’না ভাইৰাছৰ উৎস সন্ধানৰ বাবে বিশ্ব স্থাস্থ্য সংস্থাৰ দলটো চীনলৈ যায়। তাত তেওঁলোকে চাৰি সপ্তাহ তদন্ত চলায়। ইয়াৰে প্ৰথম দুসপ্তাহ নিয়ম অনুসৰি তেওঁলোকক কোৱাৰেন্টাইনত ৰখা হয়।
তদন্তকাৰী দলটোৱে ইয়াৰ পাছত য়ুহানকে ধৰি আন স্থানসমূহত কৰ’না ভাইৰাছৰ সন্ধান চলায়। কিন্তু অভিযোগ অনুসৰি, তদন্তকাৰীসকল ক’ত যাব সেয়া প্ৰশাসনেই ঠিক কৰি দিয়ে। সেয়ে, তদন্তৰ নিৰ্ভৰযোগ্যতাও সন্দেহৰ আৱৰ্তত ৰৈ গৈছে।
