আজিৰ দিনটো যেন এটা কালিকা লগা দিনহে। অসমৰ বাক্সাকে ধৰি কেইবা ঠাইতো ভয়ংকৰ পথ দুৰ্ঘটনাই বহু কেই জন লোকৰ প্ৰাণ কাঢ়ি নিটাৰ লগতে অন্ধ্ৰপ্ৰদেশতো সংঘটিত হৈছে আন এক শোকাৱহ দুৰ্ঘটনা।
অন্ধ্ৰপ্ৰদেশৰ কাৰ্নলৰ সমীপৱৰ্তী মাধাপুৰমত আজি পুৱা প্ৰায় ৪ বজাত সংঘটিত হয় এই দুৰ্ঘটনা। মাধাপুৰমৰ ৰাজপথত এখন যাত্ৰীবাহী বছৰ সৈতে বিপৰীত দিশৰ পৰা আহি থকা আন এখন ট্ৰাকৰ মুখামুখি সংঘৰ্ষ লগাৰ ফলত ১৪ গৰাকী যাত্ৰীৰ মৃত্যু ঘটে।
নিহতসকলৰ মাজত ৮ গৰাকী মহিলা আৰু শিশুও আছে।এই দুৰ্ঘটনাটোত আন ১০ গৰাকী যাত্ৰী আহত হৈছে। আহত যাত্ৰীসকলক মাধাপুৰমৰ চিকিৎসালয়ত ভৰ্তি কৰোৱা হৈছে।
কাৰ্নল জিলাৰ আৰক্ষী অধীক্ষকে প্ৰকাশ কৰা মতে নিহতসকলৰ আটাইকেইজনেই চিটোৰ জিলাৰ মাদেনপল্লীৰ বাসিন্দা আছিল। কেইবাজনো আহত যাত্ৰীক কাৰ্নললৈ উন্নত চিকিৎসাৰ বাবে নিয়া হৈছে বুলি তেওঁ জানিবলৈ দিয়ে।
আৰক্ষী অধীক্ষকগৰাকীয়ে প্ৰকাশ কৰা মতে বাছ খনত থকা যাত্ৰীসকলে আজমেৰ দৰগাহ দৰ্শৰ উদ্দেশ্যে গৈ আছিল।
অন্ধ্ৰপ্ৰদেশৰ মুখ্যমন্ত্ৰী জগন মোহন ৰেড্ডীয়ে দুৰ্ঘটনাটোত নিহতসকলৰ আত্মাৰ সদগতি কামনা কৰাৰ লগতে আহতসকলৰ আশু আৰোগ্য কামনা কৰিছে।
উল্লেখ্য দুদিন পূৰ্বেও অন্ধ্ৰপ্ৰদেশত তীৰ্থযাত্ৰী কঢ়িয়াই নিয়া বাছ এখন এটা দ’ খাৱৈত বাগৰি পৰাৰ ফলত ৮ জন যাত্ৰীৰ মৃত্যু ঘটিছিল।
