অসম বিজেপিত এতিয়া সম্পূৰ্ণ একাষৰীয়া হৈ পৰিছে বহু পুৰণি বিজেপি নেতা।
আন বহু দল বিশেষকৈ কংগ্ৰেছৰ পৰা আহি বিজেপিত যোগদান কৰা একাংশ নেতা এতিয়া হৈ পৰিছে দলটোৰ ভাগ্য নিয়ন্তা।
এনে পৰিস্থিতিত প্ৰতিকূল অৱস্থাকো নেওঁচি তাহানিৰে পৰা অসমত বিজেপি দলৰ হৈ কাম কৰি থকা বহু নেতা এতিয়া হৈ পৰিছে হতাশ।
এনে হতাশাৰ ফলতে এতিয়া বহু প্ৰৱীণ বিজেপি নেতাই ভগ্ন হৃদয় লৈ গেৰুৱা দলটো ত্যাগ কৰিবলগীয়া হৈছে। শেহতীয়াকৈ বিজেপিৰ এগৰাকী অগ্নিবৰ্ষী প্ৰৱীণ নেতা তথা হোজাইৰ বিধায়ক শিলাদিত্যক দেৱক টিকটৰ পৰা বঞ্চিত কৰি বিজেপিৰ শীৰ্ষ নেতৃত্বই ৰামকৃষ্ণ ঘোষক টিকট দিছে।
অসমত বিজেপিক নৱ ৰূপ দিয়াৰ ক্ষেত্ৰত অনবদ্য বৰঙণি থকা শিলাদিত্য দেৱক টিকৰ পৰা বঞ্চিত কৰাত স্বাভাৱিকতে ক্ষুণ্ণ হৈ পৰিছে বিধায়কগৰাকী। সেয়ে আজি তেওঁ লংকাৰ জোৰপুখুৰীস্থিত বাসভৱনত সংবাদমেল সম্বোধন কৰি বিজেপি দলৰ পৰা পদত্যাগ কৰাৰ কথা ঘোষণা কৰে।
শিলাদিত্যই কয় যে বিগত ৩০ বছৰে তেওঁ দলৰ বাবে নিঃস্বাৰ্থ ভাবে সেৱা কৰি আহিছে যদিও তেওঁৰ সেৱাৰ কোনো মূল্য দলীয় নেতৃত্বই নিদিলে। সেইবাবেই তেওঁ দল ত্যাগৰ সিদ্ধান্ত লয়।শিলাদিত্যই লগতে কয় যে বিজেপিৰ নেতৃত্বই তেওঁক ৰাজনৈতিক ভাবে হত্যা কৰিলে।
ইপিনে গেৰুৱা দলটোৰ আন এগৰাকী নিষ্ঠাবান পুৰণি কৰ্মী তথা শিলচৰ সমষ্টিৰ বিধায়ক দিলীপ কুমাৰ পালেও আজি বিজেপিৰ পৰা পদত্যাগ কৰাৰ কথা আনুষ্ঠানিক ভাবে ঘোষণা কৰে।
সোণোৱাল চৰকাৰৰ দিনতে অসম বিধানসভাৰ উপাধ্যক্ষ হিচাবে কাৰ্যনিৰ্বাহ কৰা দিলীপ কুমাৰ পালে ২০১৮ চনৰ ৮ মে’ত উক্ত পদৰ পৰা পদত্যাগ কৰিছিল। এনআৰচি প্ৰসংগত দলৰ একাংশ শীৰ্ষ নেতাৰ সৈতে মতবিৰোধ হোৱাৰ বাবেই তেওঁ বিধানসভাৰ উপাধ্যক্ষৰ পদ এৰিছিল।
দলৰ একাংশ নেতাৰ বিৰোধিতা কৰাৰ ফল এইবাৰ পালে বিধায়ক পালে। শিলচৰ সমষ্টিত পালক বঞ্চিত কৰি বিজেপিয়ে প্ৰক্ষেপ কৰিলে দ্বিপায়ন চক্ৰৱৰ্তীক। এই কথাতে আশাহত হৈ আজি দল ত্যাগ কৰে পালে।
কেৱল সেয়াই নহয়, বিজেপি ত্যাগ কৰি তেওঁ শিলচৰ সমষ্টিৰ পৰা নিৰ্দলীয় প্ৰাৰ্থী হিচাবে প্ৰতিদ্বন্দ্বিতা কৰিব বুলিও ঘোষণা কৰিছে। বিজেপিত এলাগী হৈ পৰা ব্যক্তিসকলৰ ভিতৰত দিলীপ কুমাৰ পাল অথবা শিলাদিত্যই শেষ ব্যক্তি নহয়।
আৰু বহু পুৰণি নেতাক দলটোত কৰা হৈছে এলাগী। ইয়াৰ বিপৰীতে দলটোত অধিক ক্ষমতাশালী হৈ উঠিছে সৌসিদিনালৈ বিজেপিক কুকুৰে কাঁইট নোখোৱাকৈ গালি পাৰি থকা বহু নেতা। এই দুই নেতাৰ পদত্যাগে বৰাক ভেলীৰ লগতে হোজাই সমষ্টিত বিজেপিক ক্ষতিগ্ৰস্ত কৰিব বুলি ধাৰণা কৰা হৈছে।
