মৰিগাঁও জিলাত জিলা উপায়ুক্ত তথা জিলা নিৰ্বাচনী বিষয়া লীনা দাসৰ নেতৃত্বত ২০২১ ৰ বিধানসভা নিৰ্বাচনৰ বাবে প্ৰস্তুতি তুংগত উঠিছে ।
কভিড পৰিস্থিতিৰ বাবে অতিৰিক্ত ভোট কেন্দ্ৰ মিলাই ৯০২ টা ভোট কেন্দ্ৰত পুৰুষ-মহিলা আৰু তৃতীয় লিঙ্গৰ ভোটাৰৰ সৈতে জিলা খনৰ তিনিওটা বিধান সভা সমষ্টিৰ মুঠ ৬,১৪,২৬১ গৰাকী ভোটাৰে এইবাৰ নিৰ্বাচনত ভোট দান কৰিব ।
মৰিগাঁও জিলাৰ ৭৯ নং-জাগীৰোড, ৮০নং-মৰিগাঁও আৰু ৮১নং-লাহৰীঘাট বিধানসভা সমষ্টিত অহা ১ এপ্ৰিলত দ্বিতীয় পৰ্যায়ত অনুষ্ঠিত হ’ব লগীয়া ভোট গ্ৰহণৰ বাবে জিলা প্ৰশাসনে জিলা উপায়ুক্ত, অতিৰিক্ত উপায়ুক্ত, চক্ৰ বিষয়া আৰু মাষ্টাৰ ট্ৰেইনাৰ সকলৰ উপস্থিতিত EVM/VVPAT সমূহ প্ৰথম পৰ্য্যায়ৰ ৰেণ্ডমাইজেচন কৰি তিনিওটা সমষ্টিৰ বাবে সাজু কৰিছে ।
দ্বিতীয় পৰ্যায়ৰ ৰেণ্ডমাইজেচন কৰা হ’ব অহা ১৮ মাৰ্চত আৰু এই EVM/VVPAT সমূহ কমিচনিং কৰা হব ১৯ মাৰ্চত ।
আনহাতে জিলা প্ৰশাসনে নিৰ্বাচনী প্ৰস্তুতিৰ অংশ হিচাপে যোৱা ২ মাৰ্চৰ পৰাই আৰম্ভ কৰি আগন্তুক ১৬ মাৰ্চ লৈ এলানি প্ৰশিক্ষণ কাৰ্যসূচী গ্ৰহণ কৰিছে ।
প্ৰিজাইদিং অফিচাৰ, প্ৰথম, দ্বিতীয় আৰু তৃতীয় পলিং বিষয়াসহ মুঠ ৩৭৪৮ গৰাকীয়ে প্ৰথম পৰ্য্যায়ৰ প্ৰশিক্ষণ কাৰ্যসূচীত অংশ গ্ৰহণ কৰে । তেনেদৰে ৪ মাৰ্চত প্ৰথম পৰ্যায়ৰ প্ৰশিক্ষণ কাৰ্যসূচীত মহিলা পলিং বিষয়া আৰু বি,এল,অ, সকলক পোষ্টেল বেলটৰ বাবে প্ৰশিক্ষণ দিয়া হয় । প্ৰশিক্ষণত ১৬৮৪ গৰাকীয়ে অংশ গ্ৰহণ কৰে ।
৫ মাৰ্চ তাৰিখে ৭৭ গৰাকী জনেল আৰু ছেক্টৰ বিষয়া সকলক প্ৰশিক্ষণ দিয়া হয় । সেইদৰে ৮ আৰু ৯ মাৰ্চত পলিং বিষয়া সকলক দ্বিতীয় পৰ্যায়ৰ প্ৰশিক্ষণ দিয়া হয়।লগতে ১০ আৰু ১৬ মাৰ্চত মহিলা পলিং বিষয়া আৰু মাইক্ৰ অবজাৰভাৰক প্ৰশিক্ষণ দিয়াৰ ব্যৱস্থা কৰা হৈছে ।
উল্লেখ্যে এইবেলি নিৰ্বাচন আয়োগে কভিড পৰিস্থিতিৰ বাবে বিশেষ ভাৱে সক্ষম ব্যক্তি, শ্ৰৱণ শক্তিত বাধাগ্ৰস্ত ব্যক্তি আৰু আশীৰ উৰ্দ্ধৰ জ্যেষ্ঠ নাগৰিকৰ বাবে ডাক যোগে ভোট দানৰ সুবিধা দিয়াৰ উপৰিও সাংবাদিক সকলে নিৰ্বাচনৰ সময়ত বাতৰি সংগ্ৰহ কৰা কাৰ্যত ব্যস্ত থাকিব লগীয়া হয় আৰু তেওঁলোকে ভোট কেন্দ্ৰত শাৰী পাতি ভোট দান কৰাৰ ক্ষেত্ৰত অসুবিধাৰ সন্মুখীন হ’ব লগা হয় ।
সেইবাবে এইবাৰ নিৰ্বাচন আয়োগে সাংবাদিক সকলৰ বাবেও পোষ্টেল বেলট কাগজ যোগে ভোট দানৰ সুবিধা প্ৰদান কৰিছে বুলি জিলা তথ্য আৰু জনসংযোগ বিষয়া সুনীতি নাৰ্জাৰীয়ে জানিবলৈ দিয়ে।
