ম্যানমাৰৰ জুণ্টা চৰকাৰৰ স’তে মিতিৰালি, ভাৰতৰ স্থিতিক লৈ সচকিত মানৱ অধিকাৰ সংস্থা

ম্যানমাৰৰ সামৰিক সন্ত্ৰাসক লৈ মুখ খুলিছে মাৰ্কিন ৰাষ্ট্ৰপতি জ’ বিদেনে।

দেশখনত প্ৰায় দুমাহজুৰি চলি অহা সামৰিক অভ্যুত্থানবিৰোধী প্ৰতিবাদক জুণ্টা চৰকাৰখনে দমন কৰি আহিছে।

শনিবাৰলৈকে সুৰক্ষাবাহিনীয়ে শিশুসহ ১০০জনকৈও অধিক নিৰস্ত্ৰ প্ৰতিবাদকাৰীক গুলিয়াই হত্যা কৰিছে।

এই লৈ ক্ষোভিত হৈ পৰে মাৰ্কিন ৰাষ্ট্ৰপতিজন।

”এয়া ভয়ংকৰ। ই সঁচাকৈয়ে ক্ষোভজনক। মই লাভ কৰা বাতৰি অনুযায়ী, বিনা বিচাৰে তাত অজস্ৰ লোকক হত্যা কৰি থকা হৈছে।”- ৰাষ্ট্ৰপতিজনে কয়।

শনিবাৰে, অষ্ট্ৰেলিয়া, কানাডা, জাৰ্মানী, গ্ৰীচ, ইটালী, জাপান, ডেনমাৰ্ক, নেডাৰলেণ্ড, নিউজিলেণ্ড, কোৰিয়া ৰিপাব্লিক, গ্ৰেট ব্ৰিটেইন আৰু আমেৰিকা যুক্তৰাষ্ট্ৰৰ সেনাধ্যক্ষসকলে এখনি যুটীয়া বিবৃত্তিযোগে ম্যানমাৰৰ জুণ্টা চৰকাৰক গৰিহণা জনাইছে।

বিবৃত্তিটোত জুণ্টা চৰকাৰক হিংসা পৰিত্যাগ কৰি দেশখনৰ জনসাধাৰণক শ্ৰদ্ধা আৰু সন্মান প্ৰদৰ্শন কৰিবলৈ দাবী জনাইছে।

আনহাতে, ২৭ মাৰ্চত ম্যানমাৰৰ জুণ্টা চৰকাৰে ৭৬সংখ্যক ‘ম্যানমাৰ সশস্ত্ৰ বাহিনী দিৱস’ পালন কৰা হয়।

দ্বিতীয় বিশ্বযুদ্ধত জাপানে দেশখনক দখল কৰিবলৈ আহোতে বাৰ্মীজ নেশ্বনেল আৰ্মীয়ে কৰা প্ৰবল প্ৰতিৰোধৰ সোঁৱৰণি স্বৰূপে বছৰি এই দিৱস পালন কৰি অহা হৈছে।

এই ২৭ মাৰ্চত উপলক্ষ্যে দেশখনৰ ৰাজধানী নেইপিটাউত এটা আৰ্মী পেৰেড অনুষ্ঠান পালন কৰা হয়।

পেৰেডটোত ম্যানমাৰৰ আঠখন মিত্ৰ দেশৰ প্ৰতিনিধি উপস্থিত থাকে।

মিত্ৰদেশকেইখন হৈছে- ভাৰত, চীন, পাকিস্তান, বাংলাদেশ, ভিয়েটনাম, লাওচ, থাইলেণ্ড আৰু ৰাছিয়া।

উল্লেখযোগ্য যে ম্যানমাৰৰ জুণ্টা চৰকাৰৰ এই অনুষ্ঠানটোত ভাৰতে অংশগ্ৰহণ কৰাত  মানৱঅধিকাৰ আৰু গণতন্ত্ৰবাদী সংগঠনসমূহ সচকিত হৈ পৰিছে।

Indian embassy in Myanmar sent their military attaché to the military junta’s ‘armed forces day’ ceremony. India is one of the greatest democracies in the world. Why do you shake hands with the generals whose hands are soaked with our blood? @DrSJaishankar @MEAIndia @PMOIndia

— Civil Disobedience Movement (@cvdom2021) March 27, 2021

ম্যানমাৰ প্ৰ’-ডেম’ক্ৰেছি মভমেণ্টে টুইটাৰযোগে সোধে যে বিশ্বৰ অন্যতম শ্ৰেষ্ঠ গণতন্ত্ৰ হিচাপে নাম থকা ভাৰতে কিয় তেজেৰ দাগ লাগি থকা জুণ্টা চৰকাৰৰ জেনেৰেলসকলৰ স’তে কৰমৰ্দন কৰিবলৈ প্ৰতিনিধি পঠাইছে?