এম্বুশৰ দ্বাৰা ২২ গৰাকী নিৰাপত্তাৰক্ষীক হত্যা কৰাৰ পিছত মুখ খুলিছে নিষিদ্ধ ঘোষিত কমিউনিষ্ট পাৰ্টি অৱ ইণ্ডিয়া(মাওবাদী) তথা মাওবাদীৰ নেতৃত্বই।
মাওবাদীৰ আক্ৰমণত ২২ গৰাকী নিৰাপত্তাৰক্ষীৰ মৃত্যু হোৱাৰ পিছত যোৱা সোমবাৰে ছট্টিশগড় ভ্ৰমণ কৰিছিল কেন্দ্ৰীয় গৃহমন্ত্ৰী অমিত শ্বাহে।
ছট্টিশগড় ভ্ৰমণৰ সময়ত গৃহমন্ত্ৰী অমিত শ্বাহে কৈছিল যে উগ্ৰবাদ বিৰোধী যুঁজক ‘নিৰ্ণায়ক ৰূপ’ দিয়াৰ বাবে ২২ গৰাকী ছহিদৰ ত্যাগ স্মৰণীয় হৈ থাকিব আৰু এই যুঁজখনৰ ‘গ্ৰহণযোগ্য সমাপ্তি’ৰ বাবে অভিযান তীব্ৰতৰ কৰা হ’ব।
গৃহমন্ত্ৰীৰ এই মন্তব্যৰ পিছতে নিষিদ্ধ ঘোষিত সংগঠনটোৱে এক বিবৃতিৰ যোগে তেওঁলোকৰ যুঁজ নিৰাপত্তা বাহিনীৰ জোৱানৰ বিৰুদ্ধে নহয়, এই যুঁজ পুঁজিবাদ আৰু দেশত অব্যাহত থকা ব্ৰাহ্মণ্যবাদৰ বিৰুদ্ধে বুলিহে দাবী কৰিছে।
“অমিত শ্বাহে কাৰ ওপৰত প্ৰতিশোধ ল’ব? নিপীড়িত লোক আৰু মাওবাদী একে আৰু দিনক দিনে, নিপীড়িত লোকসকলে পুঁজিবাদী আৰু ব্ৰাহ্মণ্যবাদী চৰকাৰৰ বিৰুদ্ধে মাত মাতি আহিছে…।” মাওবাদীৰ মুখপাত্ৰ অভয়ে সোমবাৰে বিবৃতিটোত কয়।
লগতে পঢ়ক : মাওবাদীৰ জিম্মাতে আছে অপহৃত কামাণ্ডো; শিবিৰসহ অপহৃত কামাণ্ডোৰ ফ’টো ভাইৰেল কৰিলে মাওবাদীয়ে
পিতৃ-মাতৃ তথা অভিভাৱকসকলক তেওঁলোকৰ সন্তানক নিৰাপত্তা বাহিনীলৈ প্ৰেৰণ কৰাৰ পৰা বিৰত থাকিবলৈ আহ্বান কৰি সংগঠনটোৱে লগতে কয়, “আমি বিশ্বাস কৰো যে বাহিনীত নিযুক্তি পোৱাসকলো শোষিত লোকসকলৰ অংশ আৰু যেতিয়া তেওঁলোকে আমাৰ সৈতে যুঁজিবলৈ অস্ত্ৰ লৈ আহে তেতিয়া যুঁজ দিয়াটো আমাৰ বাধ্যবাধকতা। মৃতকৰ পৰিয়ালৰ প্ৰতি আমাৰ সহানুভূতি আছে আৰু চিপিআই (মাওবাদী)য়ে জনসাধাৰণক তেওঁলোকৰ সন্তানক নিৰাপত্তা বাহিনীত যোগদান কৰাৰ পৰা বিৰত থাকিবলৈ অনুৰোধ জনাইছো।”
যোৱা চাৰি মাহত ২৮ গৰাকী মাওবাদীয়ে প্ৰাণ হেৰুৱা বুলি দাবী কৰি বিবৃতিটোত কোৱা হৈছে যে এই সময়ছোৱাত মাওবাদীসকলে আত্মৰক্ষাৰ বাবে চলোৱা আক্ৰমণত প্ৰায় ১০০ গৰাকী নিৰাপত্তাৰক্ষী জোৱান মৃত্যু আৰু আহত হৈছে।
ইফালে কেন্দ্ৰীয় চৰকাৰে যোৱা ছেপ্টম্বৰত প্ৰণয়ন কৰা বিতৰ্কিত তিনিখন কৃষি আইন বাতিলৰ দাবীত অব্যাহত থকা কৃষক বিদ্ৰোহলৈ সমৰ্থন ব্যক্ত কৰি মাওবাদী সংগঠনটোৱে অহা ২৬ এপ্ৰিলত দেশজোৰা ভাৰত বন্ধৰ আহ্বান জনাইছে।
