বৰাক উপত্যকাৰ কৰিমগঞ্জ জিলাৰ ৰাতাবাৰীৰ ইভিএম টেম্পাৰিঙৰ তদন্ত কৰিব অসম আৰক্ষী অমপৰাধ শাখা(CID)এ। অহা মংগলবাৰে চিআইডিৰ এটা দুজনীয়া দলে ইভিএম টেম্পাৰিঙৰ তদন্তৰ বাবে কৰিমগঞ্জত উপস্থিত হ’ব। এই কথা প্রকাশ কৰিছে চৰকাৰী সূত্ৰই।
উল্লেখ্য যে অসম বিধানসভা নিৰ্বাচনৰ ১ এপ্ৰিলৰ দ্বিতীয় পৰ্যায় ভোটগ্ৰহণত ৰাতাবাৰী এম ভি স্কুলৰ ১৪৯ নং ভোটগ্ৰহণ কেন্দ্ৰৰ ইভিএমটো নিৰ্বাচনী বিষয়াসকলৰ সৈতে বিজেপি বিধায়কৰ আত্মীয়ৰ গাড়ীত উদ্ধাৰ হৈছিল।
চৰকাৰী সূত্ৰই নৰ্থইষ্ট নাওক জনোৱা অনুসৰি ঘটনাৰ সন্দৰ্ভত চিআইডিৰ তদন্তকাৰী বিষয়াই ইতিমধ্যে প্ৰাথমিক পৰ্যায়ৰ তদন্ত আৰম্ভ কৰিছে। চিআইডিৰ দুজনীয়া দলটোৱে ইভিএম টেম্পাৰিঙত কিবা প্ৰশাসনিক ত্ৰুটিৰ আছিল নেকি সেই দিশটোকো তদন্ত কৰিব বুলি সূত্ৰটোৱে জনাইছে।
এই সন্দৰ্ভত ৰাতাবাৰী আৰক্ষী থানাৰ ভাৰপ্ৰাপ্ত বিষয়া ভোলাৰাম টেৰাঙে আমাক কয় যে জিলা দণ্ডাধীশে ইতিমধ্যে এই বিষয়টোৰ উচ্চ পৰ্যায়ৰ তদন্তৰ নিৰ্দেশ দিছে।
“ঘটনাৰ সন্দৰ্ভত আমাৰ সৈতে চিআইডিৰ বিষয়াসকলে যোগাযোগ কৰিছে। তেওঁলোকে ১ এপ্ৰিলৰ ঘটনা সন্দৰ্ভত আমাৰ পৰা তথ্য বিচাৰিছে।” আৰক্ষী বিষয়াগৰাকীয়ে নৰ্থইষ্ট নাওৰ আগত কয়।
ইফালে ৰাতাবাৰীত ইভিএম টেম্পাৰিঙৰ পিছত নিৰ্বাচন আয়োগে উক্ত কেন্দ্ৰটোত পুনৰ ভোটগ্ৰহণৰ নিৰ্দেশ দিছে যদিও পুনৰ ভোটগ্ৰহণৰ দিন এতিয়াও ঘোষণা কৰা হোৱা নাই।
ইতিমধ্যে ঘটনা সন্দৰ্ভত ভোটগ্ৰহণ কেন্দ্ৰটোৰ ভোটগ্ৰহণ পৰিচালনা কৰা প্ৰিজাইডিং বিষয়াজনক কৰ্তব্যত অৱহেলা কৰাৰ বাবে অন্য নিৰ্বাচনী বিষয়াসকলৰ সৈতে নিলম্বন কৰা হৈছে।
বিশেষ সূত্ৰই প্ৰকাশ কৰা অনুসৰি ইভিএমটো যিখন গাড়ীৰ পৰা উদ্ধাৰ কৰা হৈছিল সেই বলেৰ’ গাড়ীখন বিধায়কগৰাকীৰ পত্নী মধুমিতা পালৰ নামত পঞ্জীয়ন হৈ আছে।
স্মৰ্তব্য যে ৰাতাবাৰী ভোটগ্ৰহণ কেন্দ্ৰৰ ইভিএমটো বিজেপি বিধায়ক কৃষ্ণেন্দু পালৰ সম্পৰ্কীয়ৰ বাহনৰ পৰা উদ্ধাৰ কৰা হৈছিল। নিলাম বজাৰ নামৰ ঠাইখনত পাম্পচাৰ হোৱাৰ পিছতে উক্ত গাড়ীখনৰ পৰা সন্দেহজনকভাৱে স্থানীয় ৰাইজে ইভিএমসহ ভোটগ্ৰহণ কেন্দ্ৰটোৰ প্ৰিজাইডিং বিষয়াসহ অন্যান্য নিৰ্বাচনী বিষয়াসকলক উদ্ধাৰ কৰিছিল।
ইয়াৰ পিছতে খবৰটো বনজুইৰ দৰে বিয়পি পৰে আৰু ততাতৈয়াকৈ নিৰাপত্তাৰক্ষী উপস্থিত হৈ ইভিএমসহ বিষয়াসকলক উদ্ধাৰ কৰি গণৰোষৰ পৰা ৰক্ষা কৰে।
স্থানীয় ৰাইজে ঘটনাৰ উচিত তদন্ত বিচাৰি প্ৰতিবাদ কৰাৰ লগতে ৰাষ্ট্ৰীয় ঘাইপথো অৱৰোধ কৰে। ইয়াৰ পিছতে অসম আৰক্ষীৰ অপৰাধ শাখাৰ দুই বিষয়াক সমগ্ৰ ঘটনাটো তদন্তৰ বাবে দায়িত্ব দিছে।
