কোকৰাঝাৰ অভয়াখুটি গাওঁত শুকুৰবাৰে সংঘটিত দুজনী কিশোৰীৰ চাঞ্চল্যৰ মৃত্যুৰ পৰিস্থিতিৰ বুজ ল’বলৈ আজি কোকৰাঝাৰত উপস্থিত হয় মুখ্যমন্ত্ৰী ডঃ হিমন্ত বিশ্ব শৰ্মা।
ঘটনাস্থলীত পুৱা ১১.১৮ বজাত উপস্থিত হৈ তেওঁ ভুক্তভোগী পৰিয়ালৰ সদস্য সকলৰ সৈতে বাৰ্তালাপ কৰে। ঘটনাৰ সম্পূৰ্ণ পৰিস্থিতি তথা চৰজমিন তদন্ত কৰি মুখ্যমন্ত্ৰীয়ে সংবাদ মাধ্যমৰ আগত প্ৰকাশ কৰে যে দুয়োজনী জনজাতি ছোৱালীৰ মৃত্যু হত্যা নে আত্মহত্যা সেয়া তদন্তৰ পিছত ওলাই পৰিব। হত্যা হ’লে দোষীয়ে শাস্তি পাব আৰু আত্মহত্যা হ’লে আত্মহত্যাৰ কাৰণ উলিওৱা হব।
ইপিনে, মৃত্যু হোৱা কিশোৰী সৈতে কথা বতৰা পতা লোকৰ সম্ভেদ পোৱা গৈছে আৰু এইক্ষেত্ৰত চাৰি পাঁচজন লোকক সোধপোছৰ বাবে ইতিমধ্যে আৰক্ষীয়ে আটক কৰিছে।
আনহাতে, দুৰাৰোগ্য ৰোগত পুনৰ আক্ৰান্ত হৈ দিল্লীৰ এইমছত কালি সন্ধিয়া চিকিৎসাৰ বাবে যোৱা ৰাষ্ট্ৰীয় সোণৰ পদক বিজয়ী আৰ্চাৰ গহেলা বড়োৰ খবৰ লোৱা বুলিও সংবাদ মাধ্যমৰ আগত সদৰী কৰে মুখ্য মন্ত্ৰী ডঃ হিমন্ত বিশ্ব শৰ্মাই।
উল্লেখযোগ্য যে কোকৰাঝাৰ চহৰৰ পৰা বিশ কিলোমিটাৰ নিলগত অৱস্থিত অভয়াখুটি গাওঁত এজোপা আমগছৰ একেটা ডালত দুইজনী কিশোৰী ৰবিথা ৰাভা আৰু সমাইনা ৰাভাক চিপ লোৱা মৃত অৱস্থাত উদ্ধাৰ কৰা হৈছিল।
কিন্তু দুয়োজনী কিশোৰী একেটা ডালত কেনেকৈ চিপ লৈ আত্মহত্যা কৰি পাৰে সেয়া গ্ৰহণ কৰিব পৰা নাই ভুক্তভোগী কিশোৰীৰ পিতৃ স্বপন ৰাভাৰ লগতে বিভিন্ন দল সংগঠনে।
এই চাঞ্চল্যকৰ ঘটনাৰ ঘটনাৰ বুজ ল’বলৈ আহি প্ৰাক্তন বিধায়ক অশোক সিংঘীয়ে কয় যে অভয়াখুটি গাঁও অঞ্চলত বহু বেদখলকাৰীয়ে দখল কৰি আছে। যি বেদখলকাৰীৰ সৈতে থলুৱা জনগোষ্ঠীৰ লোকে বিভিন্ন সমস্যাৰে সন্মুখীন হয়। সেয়ে বাহিৰৰ পৰা অহা লোকক উচ্ছেদ কৰি বেদখলমুক্ত কৰিব লাগে বুলি তেওঁ দাবী কৰে।
ইপিনে,মুখ্যমন্ত্ৰী অভয়াখুটিৰ পৰা পোনে পোনে গোসাঁইগাওঁৰ বিধায়ক প্ৰয়াত মাজেন্দ্ৰ নাৰ্জাৰীৰ বাহগৃহলৈ ৰাওনা হয়।
