ইজৰাইলৰ স্পাইৱেৰ পেগাছাছে ভাৰতকে ধৰি বিশ্বৰ বহু বচা বচা লোকৰ ফোন টেপিং কৰাৰ কথাই এতিয়া ধুমুহাৰ সৃষ্টি কৰিছে।
বিভিন্ন উদ্দেশ্যলৈ এতিয়া হেকাৰে যিকোনো মানুহৰেই ফোন হেক কৰিব পাৰে। হেক হ’ব পাৰে মোৰ বা আপনাৰো ফোনটোও! কিন্তু কিদৰে জানিব আপোনাৰ ফোনটো হেক হোৱাৰ কথা ?
এয়া জানিবলৈ আপুনি আপোনাৰ ফোনটোৰ ক্ষেত্ৰত এই লক্ষণকেইটালৈ মন কৰক।
ফোন বেটাৰী সঘনাই নিস্তেজ হৈ পৰা
ফোন এটা হেক হোৱাৰ এটা প্ৰধান লক্ষণ হৈছে ফোনৰ বেটাৰী সঘনাই ল’ অৰ্থাৎ নিস্তেজ হৈ পৰা। ফোনৰ বেটাৰী যদি আপুনি ফোনটো বেছি ব্যৱহাৰ নকৰাৰ পিছতো ল’ হৈ পৰে তেন্তে বিষয়টোকলৈ আপুনি কিছু সতৰ্ক হোৱা উচিৎ হ’ব। এই ক্ষেত্ৰত আপুনি আপোনাৰ ফোনটোত কিবা অনাৱশ্যকীয় এপ নিজে নিজে সোমাই পৰিছে নেকি সেয়া পৰীক্ষা কৰক।
ফোনত ডাউনলোড নকৰা এপ
ফোন হেক কৰাৰ বাবে হেকাৰে আপোনাৰ মোবাইল ফোনটোত আপোনাৰ অজ্ঞাতেই কিছুমান ডাউনলোড
কৰা এপ সন্নিবিষ্ট কৰিব পাৰে। এনে এপৰ জৰিয়তে হেকাৰে আপোনাৰ ফোনৰ তথ্য এনে এপৰ জৰিয়তে হেক কৰিব পাৰে।
ফোনটো অতি বেছি মন্থৰ হৈ পৰিলে
আপোনাৰ ফোনটো যদি বিশেষ কোনো কাৰণ নোহোৱাকৈয়ে মন্থৰ হৈ পৰে তেন্তে আপুনি ফোনটো হেক হোৱাৰ আশংকা কৰাটো ভুল নহ’ব। এই ক্ষেত্ৰত হেকাৰে ব্যৱহাৰ কৰা মালৱেৰৰ বাবে ফোনটো মন্থৰ হৈ পৰিব পাৰে।
মোবাইল ডাটা অতি দ্ৰুতগতিত শেষ হ’লে
আপুনি মোবাইল ডাটা বিশেষ ব্যৱহাৰো কৰা নাই অথচ আপোনাৰ মোবাইলৰ ডাটা দ্ৰুত গতিত শেষ হৈ গৈছে। এনে পৰিস্থিতিত হেকাৰে আপোনাৰ ফোনটো হেক কৰাৰ আশংকা থাকে। হেকাৰে ব্যৱহাৰ কৰা বিভিন্ন এপে আপোনাৰ মোবাইলৰ ডাটা শেষ কৰিব পাৰে।
মোবাইল ফোনৰ স্ক্ৰীণত পপ আপ দেখিবলৈ পালে
আপোনাৰ মোবাইল ফোনৰ স্ক্ৰীণত যদি কেতবোৰ অবাঞ্চিত পপ আপ দেখিবলৈ পায় তেন্তে সেয়া ফোনটো হেক হোৱাৰ লক্ষণ হ’ব পাৰে। এই ক্ষেত্ৰত তেনে লিংকত কেতিয়াও ক্লিক নকৰিব।
গেলাৰীত আপুনি কেতিয়াও ডাউনলোড নকৰা অথবা নোতোলা ফটো আদি দেখিলে
আপুনি যদি ফোনৰ গেলাৰীত কেতিয়াও নোতোলা অথবা ডাউনলোড নকৰা ফটো আদি দেখিবলৈ পায় তেন্তে সেয়াও ফোনটো হেক হোৱাৰ লক্ষণ হ’ব পাৰে। ইয়াৰ অৰ্থ হ’ল আপোনাৰ ফোনৰ কেমেৰাটো আন কোনোৱাই গোপনে ব্যৱহাৰ কৰি আছে।
ফ্লাছ লাইট অন হ’লে
আপুনি আপোনাৰ মোবাইল ফোনটোৰ ফ্লাছ লাইট অন নকৰাৰ পিছতো যদি সেয়া প্ৰায়ে নিজে নিজে অন হৈ যায় তেন্তে ফোনটো হেক হোৱাৰ ইও এটা লক্ষণ হ’ব পাৰে। অৰ্থাৎ আপুনি নজনাকৈয়ে আন কোনোৱাই আপোনাৰ ফোনটো ব্যৱহাৰ কৰি থাকিব পাৰে।
ফোনটো অত্যধিক গৰম হৈ থাকিলে
কোনো কাৰণ নোহোৱকৈয়ে যদি আপোনাৰ ফোনটো অত্যধিক গৰম হৈ পৰে তেন্তে ফোন হেক হোৱাৰ ইয়ো এটা লক্ষণ হ’ব পাৰে।ফোনটো ব্যনহাৰ নকৰাৰ পিছতো ফোনটো গৰম হৈ পৰাটো হেকিঙৰে লক্ষণ।
অজ্ঞাত নম্বৰলৈ ফোন কৰা দেখুৱালে
আপোনাৰ ফোনৰ কল হিষ্টৰীত যদি আপুনি কেতিয়াও ফোন নকৰা ফোন নম্বৰ দেখিবলৈ পায় তেন্তে এয়াও ফোন হেকিঙৰ লক্ষণ। তদুপৰি যদি আপোনাৰ ফোনৰ পৰা কোনো অজ্ঞাত লোকলৈ কোনো মেছেজ পঠিওৱা আপুনি দেখিবলৈ পায় সেয়াও ফোনটো হেক হোৱাৰ লক্ষণ হ’ব পাৰে।
