প্ৰায় ৫০০ বছৰ জোৰা ধাৰাবাহিক প্ৰতীক্ষাৰ যেন অন্ত পৰিব।২০২৩ চনৰ ডিচেম্বৰ মাহত ভক্তৰ বাবে মুকলি হৈ পৰিব অযোধ্যাৰ ৰাম মন্দিৰৰ দুৱাৰ।
বিগত বৰ্ষৰ ৫ আগষ্টৰ দিনা প্ৰধানমন্ত্ৰী নৰেন্দ্ৰ মোদীয়ে অযোধ্যাৰ ৰাম মন্দিৰৰ শিলান্যাস কৰাৰ পিছৰে পৰা যুদ্ধকালীন তৎপৰতাৰে চলি আছে ৰাম মন্দিৰৰ নিৰ্মাণ কাৰ্য ।
এই গতিত নিৰ্মাণকাৰ্য চলি থাকিলে ২০২৩ চনৰ ডিচেম্বৰ মাহত ৰাম মন্দিৰ ভক্তৰ বাবে মুকলি কৰি দিব পৰা যাব বুলি আজি মন্দিৰ নিৰ্মাণৰ সৈতে জড়িত শীৰ্ষ সূত্ৰ এটাই প্ৰকাশ কৰিছে।
সূত্ৰটোৱে প্ৰকাশ কৰা মতে অযোধ্যাৰ ৰামমন্দিৰত মূল মন্দিৰৰ উপৰি এটা সংগ্ৰহালয়,ডিজিটেল আৰ্কাইভ আৰু গৱেষণা কেন্দ্ৰ থাকিব।
মন্দিৰ নিৰ্মাণৰ বাবে কৰসেৱক পুৰমৰ ৭০ শতাংশ শিল ব্যৱহাৰ কৰা হৈছে বুলিও সূত্ৰটোৱে সদৰী কৰে।মন্দিৰৰ চৌপাশে ‘পৰকোটা’ নামৰ দেৱাল নিৰ্মাণ কৰা হ’ব।
মন্দিৰটোক বানৰ পৰা ৰক্ষা কৰাৰ বাবেও বিশেষ ব্যৱস্থা গ্ৰহণ কৰা হৈছে বুলি সূত্ৰটোৱে জানিবলৈ দিয়ে।মন্দিৰৰ ভেটি নিৰ্মাণৰ কাম চলিত বৰ্ষৰ অক্টোবৰ মাহৰ শেষৰ পিনে সম্পূৰ্ণ হৈ উঠিব।
অযোধ্যাৰ ৰাম মন্দিৰ নিৰ্মাণত ব্যয় হ’ব প্ৰায় ১,০০০ কোটি টকা। ইতিমধ্যে শ্ৰীৰাম ভূমি তীৰ্থ ক্ষেত্ৰই লাভ কৰিছে প্ৰায় ৩,০০০ কোটি টকাৰ বৰঙণি।
হিন্দুসকলৰ পৱিত্ৰ ভূমি বুলি বিবেচিত অযোধ্যাত ৰাম মন্দিৰ নিৰ্মাণক লৈ চলি থকা বিবাদক ইতিমধ্যে উচ্চতম ন্যায়ালয়ে মীমাংসা কৰি দিছে।
উল্লেখ্য যে উক্ত স্থানত থকা বাবৰি মদজিদটো ১৯৯২ চনত আৰ এছ এছৰ নেতৃত্বত ধ্বংস কৰাৰ পিছতে উক্ত এলেকাটো বিবাদমান বুলি উচ্চতম ন্যায়ালয়ে ঘোষণা কৰিছিল।
পৰৱৰ্তী সময়ত উচ্চতম ন্যায়ালয়ে উক্ত স্থানত ৰাম মন্দিৰ নিৰ্মাণৰ পক্ষে ৰায় দিয়ে।
আৰ্কিটেক লাৰ্চেন আৰু ট’ব্ৰ’ই মন্দিৰৰ নিৰ্মাণ আৰ্হি বিনামূল্যে সম্পূৰ্ণ কৰি দিছে।
দেশত প্ৰায় ডেৰ লাখৰো অধিক বিশ্ব হিন্দু পৰিষদৰ সক্ৰিয় কৰ্মীয়ে ৰাম মন্দিৰ নিৰ্মাণৰ বাবে অৰ্থ সংগ্ৰহ অভিযানত অংশগ্ৰহণ কৰি আছে।
দেশৰ ৰাষ্ট্ৰপতি ৰামনাথ কোবিন্দৰ লগতে বহুসংখ্যক কংগ্ৰেছ নেতা-কৰ্মীয়ো ৰাম মন্দিৰ নিৰ্মাণৰ বাবে অৰ্থ সাহায্য আগবঢ়াইছে।
