আটছাৰ গোলাঘাট জিলা সমিতিৰ পৰা তিনি নেতাক নিলম্বন; সাংবাদিক সন্থাৰ সিদ্ধান্ত প্ৰত্যাহাৰ

ATTSA Suspended members অসম চাহ জনজাতি ছাত্ৰ সন্থাৰ বোকাখাত শাখা সমিতিৰ বাতৰি পৰিৱেশন নকৰাৰ বাবে বোকাখাতৰ সমুহ সাংবাদিকে গ্ৰহণ কৰা সিদ্ধান্ত প্ৰত্যাহাৰ কৰিছে সাংবাদিকসকলে ৷

শনিবাৰৰ দিনা বোকাখাত নাট্য মন্দিৰত বোকাখাতৰ সমুহ সাংবাদিক আৰু অসম চাহ জনজাতি ছাত্ৰ সন্থাৰ গোলাঘাট জিলা সমিতিৰ সাংগঠনিক সম্পাদক, ক্ৰীড়া সম্পাদককে ধৰি প্ৰতিনিধিৰে হোৱা এক আলোচনাত এই সিদ্ধান্ত গ্ৰহণ কৰা হয় ৷

আলোচনাত ছাত্ৰ সংগঠনটোৰ শিক্ষা সম্পাদক নয়নজ্যোতি নাহক, বোকাখাত শাখাৰ উপ সভাপতি সমুজ্জল দ’ৰা, সদস্য কিষাণ তাঁতী আৰু দীপক গঞ্জু উপস্থিত থাকে ৷

অসম চাহ জনজাতি ছাত্ৰ সন্থাৰ বোকাখাত শাখা সমিতিয়ে ৯ অক্টোবৰত বোকাখাত নাট্যমন্দিৰত কৃতি ছাত্ৰ-ছাত্ৰীক সম্বৰ্ধনা জনাইছিল য’ত উপস্থিত আছিল বোকাখাতৰ বিধায়ক তথা অসম চৰকাৰৰ কেবিনেট মন্ত্ৰী অতুল বৰাৰ লগতে মহকুমাধিপতি ডাঃ নেহা যাদৱ ৷

Also Read: মৰেল পুলিচৰ উদ্ভণ্ডালি; মাজ ৰাস্তাত হিজাব খুলিবলৈ বাধ্য কৰালে যুৱতীক!

কিন্তু সংগঠনটোৱে বোকাখাতৰ কোনো সাংবাদিককে অনুষ্ঠানলৈ আমন্ত্ৰণ কৰা নাছিল৷

ইয়াৰ বাবে বোকাখাত মহকুমা সাংবাদিক সংস্থা, বোকাখাত প্ৰেছ ক্লাব আৰু ইলেক্ট্ৰনিক মিডিয়া জাৰ্নেলিষ্ট এছোচিয়েশ্যন বোকাখাতৰ মাজত হোৱা এই ত্ৰিপাক্ষিক আলোচনাত বোকাখাতৰ সমুহ সাংবাদিকে অনিৰ্দিষ্ট কালৰ বাবে আটছাৰ বাতৰি পৰিৱেশনৰ পৰা বিৰত থকাৰ সিদ্ধান্ত গ্ৰহণ কৰিছিল৷

শনিবাৰৰ বৈঠকৰ পিছত এই সিদ্ধান্ত প্ৰত্যাহাৰ কৰে বোকাখাতৰ সমুহ সাংবাদিকে৷

Also Read: ছাত্ৰক নিৰ্দয়ভাৱে প্ৰহাৰ কৰি গ্ৰেপ্তাৰ হ’বলগীয়া হ’ল শিক্ষক

ইফালে ৯ অক্টোবৰত আয়োজিত আটছাৰ অনুষ্ঠানৰ মঞ্চত তেলচুৰিৰ কাৰ্যৰ লগত জড়িত হৈ অগ্ৰিম জামিন লোৱা এজন ৰাজনৈতিক ব্যক্তিক গামোছা পিন্ধাই সম্বৰ্ধনা জনোৱাৰ বাবে আটছাৰ গোলাঘাট জিলা সমিতিৰ সম্পাদক সুশীল কালিন্দী, বোকাখাত শাখাৰ সভাপতি সুৰজিত পাইক আৰু সম্পাদক অমৃত সাগৰ তাঁতীক এমাহৰ বাবে সংগঠনৰ পৰা নিলম্বিত কৰিছে আটছাৰ গেলাঘাট জিলা সমিতিয়ে ৷

যোৱা ১২ অক্টোবৰত গোলাঘাটত অনুষ্ঠিত আটছাৰ গোলাঘাট জিলা সমিতিৰ কাৰ্যনিৰ্বাহকত এই সিদ্ধান্ত গ্ৰহণ কৰে ছাত্ৰ সংগঠনটোৱে ৷