একাংশ ধৰ্মোন্মাদ লোকৰ পৰা ভাৰতৰ ক্ৰিকেট অধিনায়ক বিৰাট কোহলীৰ পৰিয়াললৈ সামাজিক মাধ্যমত ভাবুকি ভৰা বাৰ্তা প্ৰেৰণৰ পিছত কোহলীৰ সমৰ্থনত থিয় দিছে কংগ্ৰেছ নেতা ৰাহুল গান্ধীয়ে।
কোহলীৰ সমৰ্থনত ৰাহুল গান্ধীয়ে আজি টুইটাৰত এটা টুইট পোষ্ট কৰে।
টুইটটোত তেওঁ লিখে, “মৰমৰ বিৰাট, এই লোকসকল ঘৃণাৰে ভৰি আছে কিয়নো কোনেও তেওঁলোকক কোনো প্ৰেম নিদিয়ে। তেওঁলোকক ক্ষমা কৰক। দলটোক সুৰক্ষা দিয়ক।”
Dear Virat,
These people are filled with hate because nobody gives them any love. Forgive them.
Protect the team.
— Rahul Gandhi (@RahulGandhi) November 2, 2021
ইয়াৰ পূৰ্বে আজি দিল্লী মহিলা আয়োগে কোহলীৰ সন্তানলৈ অহা ভাবুকিৰ বিৰুদ্ধে তদন্তৰ খতিয়ান বিচাৰি দিল্লী আৰক্ষীলৈ এক জাননী প্ৰেৰণ কৰিছিল।
উল্লেখ্য যে, ডুবাইত অনুষ্ঠিত টি-২০ বিশ্বকাপত পাকিস্তানৰ হাতত ভাৰতৰ পৰাজয়ৰ পিছত বিৰাট কোহলীৰ কন্যা সন্তানটিৰ বিৰুদ্ধে ঘৃণনীয় মন্তব্য ছচিয়েল মিডিয়াত প্ৰকাশ পাইছিল।
পাকিস্তানৰ বিৰুদ্ধে মেচখনৰ পাছতে ভাৰতীয় দলৰ বেগী বলাৰ মহম্মদ ছামিক ধৰ্মৰ ভিত্তিত ইণ্টাৰনেটত আক্ৰমণৰ লক্ষ্য কৰি লৈছিল একাংশ ধৰ্মোন্মাদ লোকে। তাৰ পিছতেই দলৰ অধিনায়ক কোহলীয়ে ছামিক ধৰ্মৰ দোহাই দি আক্ৰমণ কৰা সকলক সমালোচনা কৰিছিল।
এক সংবাদ মেলত কোহলীয়ে মন্তব্য কৰিছিল যে কাৰোবাক তেওঁলোকৰ ধৰ্মৰ ওপৰত আক্ৰমণ কৰাটো মানুহ হিচাপে কৰিব পৰা আটাইতকৈ শোচনীয় কাম। ধৰ্ম মানুহৰ ব্যক্তিগত বস্তু।
কোহলীৰ এই মন্তব্যৰ পাছতে ধৰ্মোন্মাদ এচামে কোহলীৰ পৰিয়াললৈ ভাবুকি প্ৰেৰণ কৰিছিল। কোহলীৰ ন মহীয়া কন্যা সন্তানটিক বলাৎকাৰৰ ভাবুকি দিয়া হৈছিল সামাজিক মাধ্যমত।
উল্লেখ্য যে ইয়াৰ পূৰ্বে ধৰ্মোন্মাদ আচৰণৰ একাংশ লোকৰ আক্ৰমণৰ বলি হোৱা মহম্মদ ছামিৰ কাষতো থিয় হৈ ৰাহুল গান্ধীয়ে এক টুইট কৰিছিল আৰু ছামিক সমৰ্থন জনাইছিল।
