চলিত টি-২০ বিশ্বকাপৰ ছেমিত প্ৰৱেশৰ আশা নিৰ্বাপিত হৈছে ভাৰতৰ। আজি ভাৰতৰ ছেমিত প্ৰৱেশৰ বাবে গুৰুত্বপূৰ্ণ হৈ পৰা নিউজিলেণ্ড বনাম আফগানিস্তানৰ খেলখনত নিউজিলেণ্ড ৮ উইকেটত বিজয়ী হোৱাৰ লগে লগে টুৰ্নামেণ্টৰ পৰা বাহিৰ হোৱাৰ পথ প্ৰশস্ত হ’ল ভাৰতৰ। আনহাতে আজিৰ জয়েৰে বিশ্বকাপৰ ছেমিত প্ৰৱেশ কৰিলে নিউজিলেণ্ডে।
ভাৰতে বিশ্বকাপৰ প্ৰথম দুখন খেলত পাকিস্তান আৰু নিউজিলেণ্ডৰ বিপক্ষে পৰাজিত হোৱাৰ পিছত তুলনামূলকভাৱে দুৰ্বল আফগানিস্তান আৰু স্ক’টলেণ্ডক পৰাস্ত কৰি ছেমিলৈ উন্নীত হোৱাৰ কিঞ্চিত আশা জীয়াই ৰাখিছিল। অৱশ্যে এই ক্ষেত্ৰত আফগানিস্তানৰ বিপক্ষে আজিৰ খেলত নিউজিলেণ্ড পৰাস্ত হোৱাটো বাধ্যতামূলক আছিল। কিন্তু নিউজিলেণ্ডৰ জয়ে কোটি কোটি ভাৰতীয় ক্ৰিকেট অনুৰাগীৰ আশা নিৰ্বাপিত কৰে।
আজিৰ খেলখনত আফগানিস্তানে টছত জয়ী হৈ পোনতে বেটিং কৰাৰ সিদ্ধান্ত লয় যদিও ১৯ ৰানতে তিনিটা উইকেট হেৰুৱাই সংকটত পৰে। অৱশ্যে নাজিবুল্লাহ জৰ্দানে অকলেই নিউজিলেণ্ডৰ বলিং আক্ৰমণৰ সমুখত দৰ্শনীয় বেটিঙেৰে দলক এক সন্মানজনক স্থিতিলৈ নিয়ে। জৰ্দানে ৪৮ টা বলত ছয়টা চাৰি আৰু তিনিটা ছয়েৰে সৰ্বাধিক ৭৩ ৰান সংগ্ৰহ কৰে। গুলাবুদ্দিনে ১৫ আৰু নবীয়ে ১৪ ৰানৰ বৰঙণি আগবঢ়ায়।
অৱশ্যে জৰ্দানৰ বাদে আন বেটাৰসকলৰ ব্যৰ্থতাৰ বাবে আফগানিস্তানে ১২৪ ৰানত ইনিংছ সামৰে।
আফগানিস্তানৰ হৈ ব’ল্টে দুৰ্দ্দান্ত বলিঙেৰে ১৭ ৰান দি তিনিটা উইকেট লাভ কৰে। ছাউদীয়ে দুটা আৰু মিলনে,সুধী,নিচামে এটাকৈ উইকেট দখল কৰে।
আনহাতে ১২৫ ৰানৰ সহজ লক্ষ্য নিউজিলেণ্ডে সহজেই ১৮.১ অভাৰত দুটা উইকেট হেৰুৱাই অতিক্ৰম কৰে। অধিনায়ক উইলিয়ামচন ৪০ ৰান আৰু কনৱেই ৩৬ ৰানত অপৰাজিত থাকে। অপেনাৰদ্বয় গুপ্টিল আৰু মিচেলে ক্ৰমে ২৮ আৰু ১৭ ৰান কৰি আউট হয়।
দৰ্শনীয় বলিঙেৰে দলৰ জয়ত মুখ্য ভূমিকা লোৱা বেগী বলাৰ ট্ৰেণ্ট ব’ল্ট মেচৰ শ্ৰেষ্ঠ খেলুৱৈ হিচাপে নিৰ্বাচিত হয়।
আজিৰ জয়েৰে নিউজিলেণ্ডে গ্ৰুপৰ দ্বিতীয় দল হিচাপে ছেমিত প্ৰৱেশ কৰাৰ লগে লগে ভাৰত আৰু আফগানিস্তান টুৰ্নামেণ্টৰ পৰা বাহিৰ হয়।
ভাৰতে এতিয়া গ্ৰুপৰ অন্তিমখন গুৰুত্বহীন মেচত নামিবিয়াৰ বিপক্ষে অৱতীৰ্ণ হ’ব।
