দৰং জিলাৰ গৰুখুঁটিৰ উচ্ছেদৰ পিছতেই ৰাজ্যৰ মুখ্যমন্ত্ৰী হিমন্ত বিশ্ব শৰ্মাই লামডিং সংৰক্ষিত বনাঞ্চলত বেদখলৰ কথা উল্লেখ কৰি শীঘ্ৰে এই বনাঞ্চলত উচ্চেদ অভিযান চলোৱা হ’ব বুলি ঘোষণা কৰিছিল।
এই ঘোষণাৰ পাছতে আজি পুৱা সংৰক্ষিত বনাঞ্চলখনত বেদখল উচ্ছেদৰ বাবে সেনা বাহিনীসহ উপস্থিত হৈছে জিলা উপায়ুক্ত, আৰক্ষী অধীক্ষক, বন বিষয়াকে ধৰি জিলা প্ৰশাসনৰ উচ্চ পদস্থ বিষয়াসকল।
বনাঞ্চলখনৰ ভেটনালা আৰু কমৰপানীৰ বেদখল স্থলীত প্ৰশাসনে উচ্ছেদ অভিযান চলাইছে।
উচ্ছেদ অভিযান চলাবলৈ যোৱা আৰক্ষী প্ৰশাসনক সহযোগিতা আগবঢ়াইছে দখলকাৰীসকলে। উচ্ছেদৰ পূৰ্বেই জাননী প্ৰেৰণ কৰি জিলা প্ৰশাসনে দখলকাৰীসকলক সেই স্থান এৰি যাবলৈ নিৰ্দেশনা প্ৰদান কৰিছিল। সেই নিৰ্দেশনা অনুসৰিয়েই দখলকাৰীসকলে সংৰক্ষিত বনাঞ্চলখনৰ দখলকৃত ভূমি ত্যাগ কৰি আন স্থানত গৈ অৱস্থান কৰিছে।
আনহাতে একাংশ লোকে দাবী কৰিছে তেওঁলোক সেই স্থানৰ স্থায়ী বাসিন্দা। কেইবা বছৰ ধৰি তেওঁলোক সেই স্থানত বসবাস কৰি আছে।
ইফালে একাংশ লোকে ধনৰ বিনিয়মত সংৰক্ষিত বনাঞ্চলখনত ধনৰ বিনিময়ত ভূমিৰ আদান-প্ৰদান কৰাৰ অভিযোগ উত্থাপন হৈছে। ১০ বিধা বনাঞ্চলৰ ভূমি ১ লাখ টকাত বিক্ৰী কৰাৰ অভিযোগ উঠিছে। মৰিগাওঁ, নগাওঁ আদি দাঁতিকাষৰীয়া অঞ্চলৰ বান বিধ্বস্ত এলেকাৰ ভূমিহীন লোকক একাংশ লোকে ধনৰ বিনিময়ত লামডিং সংৰক্ষিত বনাঞ্চলত আনি সংস্থাপিত কৰিছিল বুলি অভিযোগ উত্থাপন হৈছে।
ইফালে উচ্ছেদৰ পূৰ্বে জিলা উপায়ুক্ত গৰাকীয়ে কয় য়ে, দাঁতিকাষৰীয়া জিলাৰ পৰা যিসকল ভূমিহীন লোকে সংৰক্ষিত বনাঞ্চলখনত আহি ভূমি দখল কৰি আছিল তেওঁলোকক ভূমি আবণ্টন দিবলৈ তেওঁ পত্ৰ প্ৰেৰণ কৰিব। উল্লেখ্য যে লামডিং সংৰক্ষিত বনাঞ্চলখনৰ ৫০০ হেক্টৰ ভূমি বেদখলমুক্ত কৰিব প্ৰশাসনে। দুদিন ধৰি উচ্ছেদ অভিযান চলিব বুলি প্ৰশাসনৰ ফালৰ পৰা জানিবলৈ দিয়ে।
উচ্ছেদ স্থলীত হ’ব পৰা যিকোনো অনাকাঙ্ক্ষিত পৰিস্থিতিৰ প্ৰতি লক্ষ্য ৰাখি বিশাল আৰক্ষী বাহিনী মোতায়েন কৰা হৈছে। অৱশ্যে বৰ্তমানলৈকে শান্তিপূৰ্ণভাৱে চলি আছে উচ্ছেদ অভিযান।
