লাডাখৰ লগতে অৰুণাচলতো চীনে ব্যাপক হাৰত আগ্ৰাসন চলাই যোৱাৰ সময়তে চীন-ভাৰত সম্পৰ্ক সন্দৰ্ভত আজি আন্তঃৰাষ্ট্ৰীয় মঞ্চত নিজৰ মত ব্যক্ত কৰিছে ভাৰতৰ বৈদেশিক মন্ত্ৰী এছ জয়শংকৰে।
ছিংগাপুৰত অনুষ্ঠিত নিউ ইক’নমিক ফৰামৰ বৈঠকত ভাগ লৈ জয়শংকৰে কয় যে চীনে ভাৰতৰ সৈতে কৰা চুক্তি ভংগ কৰি আহিছে আৰু এই ক্ষেত্ৰত দেশ খনে কোনো পতিয়নযোগ উত্তৰ দিব পৰা নাই।
বিগত বৰ্ষৰ ৫ মে’ৰ দিনা লাডাখৰ পাংগং হ্ৰদৰ পাৰত চীনৰ সেনাই ভাৰতীয় সেনাক আক্ৰমণ কৰাৰ ঘটনাৰ পিছৰে পৰা দুয়ো খন দেশৰ মাজৰ সম্পৰ্কৰ অধিক অৱনতি ঘটিছিল।
লাডাখ সমস্যাকলৈ চীন আৰু ভাৰতৰ মাজত এতিয়ালৈকে ১৩ লানি আলোচনা অনুষ্ঠিত হৈছে আৰু শীঘ্ৰে ১৪ লানি আলোচনাও অনুষ্ঠিত হ’ব বুলি ভাৰতৰ বৈদেশিক মন্ত্ৰীগৰাকীয়ে বৈঠকত উল্লেখ কৰে।
তেওঁ কয় যে চীনৰ বিদেশ মন্ত্ৰী ৱাং য়িৰ সৈতে তেওঁ কেইবাবাৰো বৈঠকত মিলিত হৈছে।
প্ৰতিবাৰেই ভাৰতে চীনক যিবোৰ বিষয়ত হস্তক্ষেপ নকৰিবলৈ স্পষ্ট ভাবে কৈছিল সেই সকলোবোৰ কথাই চীনে উলংঘা কৰা বুলি জয়শংকৰে মন্তব্য কৰে। তেওঁ কয় যে এনেবোৰ কাৰণতে চীনৰ সৈতে ভাৰতৰ সম্পৰ্ক উন্নীত হোৱা নাই।
জয়শংকৰে লগতে কয় যে চীন-ভাৰত বিবাদ নিষ্পত্তিৰ ক্ষেত্ৰত ৰাষ্ট্ৰসংঘই হস্তক্ষেপ কৰিব বুলি ওলোৱা খবৰ উৰাবাতৰিহে।
আমেৰিকাই এতিয়া পূৰ্বৰ তুলনাত নৰমপন্থী মনোভাৱ গ্ৰহণ কৰাৰ কথা স্বীকাৰ কৰি আমেৰিকা ভাৰতৰ বন্ধু ৰাষ্ট্ৰ বুলি কয়। আমেৰিকাই মুকলি মনেৰে ভাৰতৰ সৈতে বিভিন্ন বিষয়ত সহযোগ কৰা বুলিও জয়শংকৰে মন্তব্য কৰে।
উল্লেখ্য উক্ত অনুষ্ঠানত প্ৰাক্তন মাৰ্কিন সচিব হিলাৰী ক্লিণ্টনৰ লগতে ব্ৰিটেইনৰ প্ৰাক্তন প্ৰধানমন্ত্ৰী টনি ব্লেয়াৰো উপস্থিত আছিল। জয়শংকৰে কয় যে চীনে সম্প্ৰসাৰণবাদী মনোভাব গ্ৰহণ কৰাটো সঁচা।
কিন্তু দেশ খনে যি পদ্ধতিৰে সম্প্ৰসাৰণবাদ আৰম্ভ কৰিছে সেয়া শুদ্ধ নহয়।
প্ৰশান্ত মহাসাগৰীয় অঞ্চলত আন দেশৰ সম্প্ৰসাৰণবাদ ৰোধ কৰাৰ লক্ষ্যৰে ভাৰত,জাপান,আমেৰিকা, অষ্ট্ৰেলিয়াকলৈ গঠিত QUAD ৰ প্ৰসংগও জয়শংকৰে উল্লেখ কৰে।
তেওঁ ভাৰতে সমিলমিলেৰে বিশ্বৰ আন দেশৰ সৈতে কান্ধত কান্ধ মিলাই প্ৰগতিৰ বাটত আগুৱাই যাব বিচাৰে বুলিও মন্তব্য কৰে।
