‘সোণৰ অসম’ৰ হওক বা নহওক, অসম এতিয়া ‘সুৰাৰ অসম’ হোৱাৰ দিশে আগবাঢ়িছে ৷
ৰাজ্য চৰকাৰে শীঘ্ৰে ধুবুৰী জিলাৰ চাপৰকে ধৰি ১১খন জিলাত নতুনকৈ বিলাতী সুৰাৰ বিপণী অৰ্থাৎ ৱাইন শ্বপ খোলাৰ অনুমতি দিবলৈ ওলোৱাত তীব্ৰ প্ৰতিক্ৰিয়াৰ সৃষ্টি হৈছে।
ইয়াৰ বাবে ইতিমধ্যে ৰাজ্য চৰকাৰৰ আবকাৰী বিভাগে বিলাতী সুৰাৰ বিপণী খোলাৰ বাবে ইচ্ছুক ব্যৱসায়ীৰ পৰা আবেদন প্ৰ-পত্ৰ বিচাৰি জাননী জাৰি কৰিছে৷
উল্লেখযোগ্য যে অসমৰ প্ৰাক্তন মুখ্যমন্ত্ৰী জননেতা শৰৎ চন্দ্ৰ সিংহই তেওঁৰ জন্মনগৰী চাপৰত যাতে কোনোদিনে বিলাতী সুৰাৰ বিপনী স্থাপন কৰা নহয় তাৰ বাবে নগৰ সমিতি গঠনৰ সময়ত ১৯৮৯ চনতে ৰাজহুৱাভাৱে চাপৰ নগৰ সমিতিক আহ্বান জনাইছিল।
সেইসময়তে চাপৰৰ সিংহপুৰুষসদৃশ প্ৰয়াত ডালিম কুমাৰ মেধিকে ধৰি একাংশ সমাজসেৱকেও চাপৰ নগৰ সমিতিত এই সন্দৰ্ভত এখন আবেদনো দাখিল কৰিছিল।
জননেতাগৰাকীৰ আহ্বানৰ প্ৰতি সন্মান জনাই চাপৰ নগৰ সমিতিয়ে আজিলৈকে চাপৰ নগৰত বিলাতী সুৰাৰ বিপনী স্থাপনৰ অনুমতি দিয়া নাছিল।
কিন্তু মন্ত্ৰী পৰিমল শুক্লবৈদ্যৰ নেতৃত্বাধীন আবকাৰী বিভাগে বিগত ২৫ অক্টোবৰতে ই এক্স-১৪৫/২০১৭/৮৭ নম্বৰ নিৰ্দেশনাযোগে অসমৰ ১১খন জিলাৰ ২০টা স্থানৰ লগতে চাপৰতো ৱাইন শ্বপ খোলাৰ অনুমতি প্ৰদান কৰাত তীব্ৰ প্ৰতিক্ৰিয়াৰ সৃষ্টি হৈছে।
জননেতা শৰৎ চন্দ্ৰ সিংহৰ আদৰ্শক পদানত কৰি চাপৰত যাতে বিলাতী সুৰাৰ বিপনী স্থাপন কৰা নহয় তাৰবাবে ধুবুৰী জিলা সাহিত্য সভাৰ সভাপতি তৰণীকান্ত ৰায়, মুখপাত্ৰ তিলক প্ৰসাদ, বিলাসীপাৰা মহকুমা ছাত্ৰ সন্থাৰ সম্পাদক বাবুজিতু ৰায়, আক্ৰাছুৰ কেন্দ্ৰীয় সহকাৰী সম্পাদক কৰ্ণ ৰায়, আমছুৰ বিলাসীপাৰা জিলা সমিতিৰ সাধাৰণ সম্পাদক সহিদুল সৰকাৰ, অসম জাতীয় পৰিষদৰ যুৱশক্তিৰ বিলাসীপাৰা জিলা সমিতিৰ মুখ্য উপদেষ্টা আৰিফুল হুছেইন, সদৌ অসম গৰিয়া মৰিয়া দেশী জাতীয় পৰিষদৰ উপসভাপতি আতিকুল হুচেইন আদিকে ধৰি বিভিন্ন দল সংগঠনে ৰাজ্য চৰকাৰক আহ্বান জনোৱাৰ লগতে এই সন্দৰ্ভত মুখ্যমন্ত্ৰী ডঃ হিমন্ত বিশ্ব শৰ্মাৰ হস্তক্ষেপ কামনা কৰিছে।
তেওঁলোকে বঙাইগাওঁত অনুষ্ঠিতব্য কেবিনেটতে উক্ত সিদ্ধান্ত বাতিল কৰিবলৈ দাবী জনাইছে।
অন্যথা চাপৰবাসী ৰাইজৰ সহযোগত তীব্ৰ গণ আন্দোলন গঢ়ি তোলা হব বুলি সংগঠন কেইটাই মত পোষণ কৰিছে।
