উইজডেন বাচনি পেনেলে খেলুৱৈসকলৰ বৰ্তমানৰ ফৰ্ম আৰু সামগ্ৰিক ৰেকৰ্ড দুয়োটাৰ ওপৰত আধাৰিত কৰি বিশ্ব টেষ্ট একাদশ বাছনি কৰিছে।
Wisden.com ৰ পৰিচালনা সম্পাদক বেন গাৰ্ডেনাৰ, Wisden.com ৰ লেখিকা তাহা হাছিম আৰু ৱিজডেন ইণ্ডিয়াৰ সম্পাদক আদ্য শৰ্মা এই পেনেলিষ্টৰ সদস্য আছিল।
দলটোত স্থান লাভ কৰিছে ভাৰতৰ চাৰিজন ক্ৰিকেটাৰে। অষ্ট্ৰেলিয়াৰ তিনিজন, ইংলেণ্ডৰ দুজন, নিউজিলেণ্ড আৰু পাকিস্তানৰ এজনকৈ ক্ৰিকেটাৰে।
দলৰ অপেনাৰ হিচাপে আছে ভাৰতৰ ৰোহিত শৰ্মা আৰু অষ্ট্ৰেলিয়াৰ মাৰ্কোচ লাবুচেন।
আনহাতে মিডল অৰ্ডাৰত পেনেলে ঠাই দিছে ইংলেণ্ডৰ অধিনায়ক জ’ ৰুট, অষ্ট্ৰেলিয়াৰ ষ্টিভ স্মিথ আৰু নিউজিলেণ্ডৰ কেন উইলিয়ামচন। উইলিয়ামচনক দলৰ অধিনায়ক হিচাপেও বাচনি কৰা হৈছে।
দলৰ উইকেট ৰক্ষক হিচাপে স্থান দিয়া হৈছে পাকিস্তানৰ মহম্মদ ৰিজৱানক। উইকেট ৰক্ষকৰ বাচনিৰ ক্ষেত্ৰত পেনেলে জনায় যে, যদিও ৰিজৱানে মাত্ৰ ১৭ খনহে টেষ্ট খেলিছে, সেই খেলকেইখনত ৪২ ৰ ওপৰৰ গড়ে ৰান সংগ্ৰহ কৰিছে।
ভাৰতৰ ঋষভ পণ্ট উইকেট ৰক্ষক হিচাপে অন্যতম পচন্দ আছিল যদিও ধৈৰ্য আৰু ধাৰাবাহিকতাৰ ব্যৰ্থতাৰ বাবে ৰিজৱানক প্ৰথম পচন্দ হিচাপে দলত ৰখা হয়।
ভাৰতৰ দুই তাৰকা ৰবীন্দ্ৰ জাদেজা আৰু ৰবিচন্দ্ৰন অশ্বিন যুটিক দলত স্পিন বলিং অলৰাউণ্ডাৰ হিচাপে স্থান দিয়া হৈছে। বিগত সময়চোৱাত এই যুটিয়ে বিশ্ব ক্ৰিকেতত ভাৰতৰ উত্থানত অন্যতম বৰঙনি আগবঢ়াইছে।
বলিঙৰ লগতে বেটিঙতো তেওঁলোকে পাৰদৰ্শিতা প্ৰদৰ্শন কৰিছে। বিশেষকৈ যোৱা দুই-তিনি বছৰত ল’ৱাৰ অৰ্ডাৰ বেটিং ক্ৰমত জাদেজাৰ বেটিঙ অনবদ্য বুলি মন্তব্য কৰে পেনেলে।
দলৰ পেচ বলিং এটেকত আছে অষ্ট্ৰেলিয়াৰ পেট কামিনছ্, ইংলেণ্ডৰ জেমচ এণ্ডাৰচন আৰু ভাৰতৰ যশপ্ৰীত বুমৰাহ।
আনহাতে ভাৰতীয় তাৰকা তথা এইসময়ত বিশ্বৰ অন্যতম শ্ৰেষ্ঠ তাৰকা বিৰাট কোহলীয়ে স্থান লাভ কৰিবলৈ সক্ষম নহ’ল এই দলত। কোহলী সম্পৰ্কে পেনেলে মন্তব্য কৰে যে কোহলী নি: সন্দেহে বিশ্বৰ অন্যতম শ্ৰেষ্ঠ তাৰকা।
কোহলী, ৰুট, স্মিথ, উইলিয়ামচন — এই ‘ফেভ ফ’ৰ’ ক বৰ্তমান বিশ্ব ক্ৰিকেটত উলাই কৰিব নোৱাৰি। কিন্তু যোৱা দুই বছৰত কোহলীৰ প্ৰদৰ্শন নিম্নগামী হৈছে। যোৱা দুই বছৰত কোহলীৰ নামত এটাও আন্তঃৰাষ্ট্ৰীয় শতকীয় ইনিংছ নাই। সেই বাবে বৰ্তমানৰ প্ৰদৰ্শনলৈ চাই কোহলীক দলত স্থান দিয়া নহ’ল।
