শিৱসাগৰ হাঁহচৰা ক্ৰীড়া আৰু সাংস্কৃতিক সন্থাৰ প্ৰেক্ষাগৃহত মণি চেতিয়া সোঁৱৰণী সমন্বয় ক্ষেত্ৰত ১০,১১ আৰু ১২ ডিচেম্বৰত তিনিদিনীয়া কাৰ্যসূচীৰে আৰম্ভ হৈছে ‘হাঁহচৰা নাট মহোৎসৱ’।
হাঁহচৰাৰ নাট্য আন্দোলনত প্ৰয়াত ৰূদ্ৰৰাম দত্ত, ৰামচন্দ্ৰ বৰপাত্ৰগোঁহাই, কিৰণ গগৈ, কেশৱ চেতিয়া, লক্ষী বৰুৱাসহ বহু বৰেণ্য ব্যক্তিৰ অৱদানেৰে সাংস্কৃতিক পথাৰখন চহকী কৰি থৈ যোৱাৰ লগতে শ্ৰীমন্ত শংকৰদেৱ থিয়েটাৰৰ প্ৰতিষ্ঠাপক বিশ্ব শইকীয়াৰ অৱদানেৰে উজ্জ্বলি উঠা এই হাঁহচৰাৰ পূৰ্বৰে পৰাই সাংস্কৃতিক পথাৰত এক সুকীয়া পৰিচয় আছে৷
সেইয়ে এই মহান ব্যক্তি সকলৰ আদৰ্শ তথা সংস্কৃতিৰ ভেটিক নৱপ্ৰজন্মৰ মাজত পৰিচয় কৰাই দিয়াৰ উপৰিও নাট্য চৰ্চাক এক অনন্য মাত্ৰা প্ৰদান কৰাৰ উদ্দেশ্যৰে হাঁহচৰাত এই নাট মহোৎসৱ অনুষ্ঠিত কৰা হৈছে৷
১০ ডিচেম্বৰত পাকিজা বেগমৰ শিশু নাট ‘সৰু ধেমালি বৰ ধেমালি’ আৰু পদ্মনাথ গোহাঞিবৰুৱাৰ ৰচনা ‘টেটোন তামুলী’ নাটক অনুস্থিত হয়।
১১ ডিচেম্বৰত সেৱাব্ৰত বৰুৱাৰ ৰচনা ‘সাজৰ তৰা’ আৰু শিশু নাট ড° অনিল শইকীয়াৰ ৰচনা ‘ৰং আহে পাহি মেলি’ আৰু অন্তিম দিনা অৰ্থাৎ ১২ ডিচেম্বৰত নটসূৰ্য ফণী শৰ্মাৰ ৰচনা ‘ভোগজৰা’ সহ প্ৰমোদ গগৈৰ ৰচনা আৰু পৰিচালনাৰে “ৰাজকন্যা” নৃত্য-নাতিকা মঞ্চস্থ কৰা হ’ব৷
উদ্যাপন সমিতিৰ মুখ্য ব্যৱস্থাপক নিলোৎপল বুঢ়াগোহাঁয়ে তিনিদিনৰ কাৰ্যসূচীতে ৰাইজৰ উপস্থিতিৰ আহ্বান জনাইছে৷
